CHAWIMAWI LA, ANIN A CHAWI SANG ANG CHE

CHAWIMAWI LA, ANIN A CHAWI SANG ANG CHE

(Rev. D.Lawmsanga)

Thufingte : 4 :8 “Chawimawi la, a nin a chawisang ang che, i lawm chuan   zahawmah a siam ang che”

Thuhma

          Khawvela cheng mi tute pawh hian mite chawimawi leh chawi san hi kan duh vek a, mi ang lo anga kan ngaihte pawh hian chawimawi leh fak hi an lawmna ber  a ni ve tho mai. A der pawhin han fak ila, an lawm thei em em mai a ni. Engvang nge mite chawimawi kan duha kan lawm em em kan tih chuan ran nungte ang lo taka Siamtu Pathianin Ama anpuia min lo siam vang a ni a. Keini mihringte hi  Pathianin theihna sang tak neiin min siam a, chu kan theihna sang tak chu mite hmaah tihlana a awm ve leh miten min chawimawi se tih kan duh thin a ni. Keini mihringte mahin mite chawimawi leh fak kan duh si chuan kan biak Pathian pawh hian thinlung taka amah chawimawitu chu a lawm ngei ang. Pathian leh mite chawi san kan duh chuan kan tih hmasak tur thil a awm. Chung  chu amah Pathian chawimawi hi a ni. Engtin nge Pathian chu kan chawimawi theih ang? Pathian chawimawi dan chi thum chauh han tar lang i la:

1.   Thuawihna hmanga Pathian chawimawi

                  Kan Bible-ah hian thuawihna hmanga Pathian chawimawitute nihlawhna leh thuawih lotute chan rapthlakzia thu hi hmun tam takah a tarlang a. Chung zinga kan hriat lar em em Pathian thuawihtu Abrahama leh a thuawih lotu Lal Saulate chanchin aṭangin sawi hmasa i la. Abrahama chu Pathianin a hriat ngai lohna hmun leh a la hmuh ngai-lohna hmunah kalchhuak tur leh a laichin zawng zawng kalsan tura  a tih lai khan engmah phun nawi lovin a kalchhuak mai a nih kha. Kawng lakah buaina namen lo a tawk  a ; a nupui duh tak mai chu Pharoa’n nupuiah a neihsak ta hial a. Amaherawhchu, Pathian a lama aṭang tlat avangin thuawihtu Abrahama khan dawt sawi mah se, Pathianin a manganna ata a chhanchhuak leh tho tho mai. Engvang nge tih chuan Pathian thuawihna hmanga chawimawitu a nih tlat vang a ni.

             Pathian thuawi lotu Lal Saula ve thung kha chu Amalek ral an beih dawnin hluihlawn thil engmah la lo turin Pathianin a hrilhna a, amaherawhchu an lal Agaga leh bawngpa thau ṭha ṭha, beram thau ṭha ṭha inthawina atan a hawn lui a. Ama ngaihdan chuan thil ṭha hmanga Pathian hnena inthawina hlan chu Pathianin a lawm tho turah a ring a ni. Mahse, Pathian chuan inthawina aiin thuawih a lawm zawk avangin thuawih lotu Lal Saula chu Pathianin Israel lal nihna aṭangin a paih thla ta a, a hawisan hmak mai a ni. Lal Saula khan engtiang pawhin pawi tiin inchhir mah se, Pathianin a hawisan tlat tawh.Thuawih lotu lal Saula chunga thil thleng rapthlakzia aṭang hian Pathian chawimawi loh a pawizia kan hre thei a ni.

2.   Chetzia leh thil tiha Pathian chawimawi

              A pahnihna chu thiltiha Pathian chawimawi dan a ni a, kan chetzia awm dan hmang hian Pathian hi chawimawi theih a ni. Naupang tet ata Pathian ṭihtu Josefa chanchin hi a ngaih nawm teh a sin. A pa, Jacoba duhsakna leh hmangaihna a dawn bikna chu a ute tan chhuntu hling a lo ni a. A uten sumdawng hausa hnena an hralh hnuah Aigupta ramah luhpui a ni a. Vengtu pawl hotu Potiphara hnenah sumdawng hausaten an hralh chhawng ve leh ta a. A pu Potiphara nupuiin mutpui tura a sawm lai khan rawl thar ve mai a la ni. Ani chuan tihian a chhang a, “Engtin nge he sual liantak hi tiin Pathian chunga thil ka tihsual theih ang?” a ti a(Gen 39:9). Sual a hmuh dan hi lian takah a hmuh phal maibakah

Potiphara hmaah mai ni lo engkim chunga roreltu Pathian hmaa thil tisual tur a nih a hre phal tlat mai hi a entawn tlak hle mai.

                 Keini pawh kan hmaa thil ṭha lo tih tur remchang tak a lo awmin sual lian tak angin hmu phal ve i la, sual lian taka kan ngaih chu tihhlawh tlin a har deuh nghe nghe \hin a ni. Tin, tute chungah emaw tisual tur ang chauh vah inngai lovin Pathian chunga thil tisual tur kan nih inhre ṭhin bawk i la, a va ṭha dawn em! Josefa chuan Pathian ṭihna avangin sual chu taksa ngeiin a tisa chakna ata a tlan chhuahsan phal a.Thu chauh ni lo thil tihin Pathian a chawimawi a ni. Chetzia leh thil tiha Pathian chawimawitu a nih avangin tan in thim hrehawm tak ata Pathianin dinhmun sang takah a chawisang ta a ni.

      Pathian thu kan sawi apianga kan lam zin pawl zingami Daniela leh a ṭhiante chanchin pawh hi sawi tel loh chi a ni lo vang. Nebukadnezzara chuan rangkachak milim lianpui siamin a ram mipui zawng zawngte chibai buk tura a tih khan Daniela ṭhian pathumte chuan chibai an buk duh ve loh avangin meipuiah theh luh an ni a. Mahse, thil tiha Pathian chawimawitute chu Pathianin meipui hlauhawm tak ata an samzai pakhat pawh mei rim nam lovin a chhan  chhuak a, an dinhmun hmasa aia sangah a awmtir a ni. Chumai bakah ring lomi lal Nebukadnezzara khan Pathian engkimtitheia chu a fak phah ta a ni. Thil tiha Pathian chawimawitute chu Pathianin a theihnghilh ngai reng reng lo va, a chawisang \hin a ni.

3.   |awngka hmanga Pathian chawimawi

                A pathumnaah chuan ṭawngka hmanga Pathian chawimawi a ni a, thil tiha lantir hi a tawk mai lo va; kan ka ngeiin Pathian hi fak ṭhin i la, chu chu amah kan chawimawina a ni.“Tu pawh lawm thu sawi inthawina hlan apiang chuan mi chawimawi thin a”(Sam 50:23) tiin kan hmu a ni. ‘Lalpa ka lawm e’ kan han tih mai pawh hian Pathian chawimawitu  kan lo ni tawh reng a. Pathian chawimawi hi thil harsa tak anga kan ngeih ṭhin avangin kan fak tur ang leh kan chawimawi tur angin kan chawimawi thei lo fo. Mi chanchin \ha lo leh mi huatzawng sawi ai chuan Pathian hmangaihna thute hi sawi tam zawk \hin i la Pathian hi a lawm zawk ngei ang le.     

  Mihringte kan lo awm chhan ber chu a siamtu chibai buk a, Pathian ropuina tarlang tur leh a rawngbawl turin a ni. Min siamtu chuan min siam mai ni lovin min enkawl a, kan tana ṭha turin ro min relsak bawk ṭhin. Heti ema min hmangaihna hi a ropuiin faktlak a ni tak meuh a.Kan taksa peng hrang hrang a zawm khawm dante, kan chhunga thilawm zawng zawng inchuktuah dante hi a ropuiin a mak em em mai a ni. Heng zawng zawng hi mahni theihna hmanga inveng tur ni ila chuan tumahin kan thlin lo vang. Ani chuan min lo enkawl a, min lo vensak reng zawk a lo ni. Chung ringawt pawh chu a mal te tein han chhiar i la, lawmna tur leh amah fakna tur hlir a ni tih i hre thei ang.

Tlangkawmna

             A chunga Pathian chawimawi dan chi thum kan sawi tak aṭang khian Pathian chu thuawihna hmanga chawimawitu nih te, chetzia leh thil tiha chawimawitu nih te, ṭawngka hmanga chawimawitu nih a pawimawhzia kan hre ta a. Ringtuten a thu kan awihna te chu chetzia leh thiltihin lantir i la, kan kâ aṭang ngei hian amah fakna leh chawimawina chhuak fo se a va ṭha dawn em! Fak tlak leh chawimawi tlakte chu kan chawimawi tur a ni a, chawimawi tlak loh kan chawimawi hian buaina kan tawh phah fo ṭhin. Kan biak Pathian hi chu chawimawi tlak a ni a, anihna tur angin kan chawimawi thei lo zawk a ni. Pathianin  chawi sang a duh  apiang chu tumahin an dang zo lo va, paihthlak a duh reng reng chu tumahin an chawi sang thei bawk hek lo. Pathian chawimawitu kan nih ṭheuh theihnan Lalpan mal sawm mawlh rawh se.   

I CHHUNGTE KHAWSAK DAN TUR RELSAK RAWH

I chhungte khawsak dan tur relsak rawh

Rev.D.Lawmsanga,National secretary

Pate ni paper

Bible chhiar tur :   Isaia 38:1

                          

Thuhma

          Juda lal Hezekia chu natna hlauhawm tak tuara khuma a mut laiin Pathianin Zawlnei Isaia hmangin a dam chhuah dawn loh thu a hriattir mai bakah  a thih hma ngeia a chhungte khawsak, awm  dan tur rel fel turin a duh a. A chhungte khawsak dan tur rel fel nan  kum sawm leh panga meuh mai Pathianin a nun a pawh seisak a ni. Judaho hian chhungkaw ro sem hi an ngai thupui hle a, ro sem dan chungchangah pawh dan fel tak an nei sa a ni. Chu chu chhungkaw pa ber mawhphurhnaah an ngai a, ro chu dan ang thlapin a thih hma ngeia rel fel vek tur a ni bawk.

          I chhungkua chu  sum tam tak hnutchhiahin i thihsan pawh a ni thei e. Amaherawhchu  an nun dan tur fel tak i thihsan loh chuan rosum inchuhin I fate an la buai ngei ang. Chhungkaw dintu Pathian hian chhungkaw awm dan tur leh kal zel dan tur hi a ngaih pawimawhzia kan hre thei a ni. Chuvangin, chhungkua hi eng nge a nih tih te, eng tianga pawimawh nge a nih tih te, engtin nge chhungkua khawsak dan chu kan rel fel tak ang le? Tih te hi kan ngaihtuah tur chu a ni.

Chhungkua

          Chhungkua hi Pathian thil siam mawi ber leh ropui berte zinga mi a ni a, a thiltum bulpui ber pawh a thil siam zawng zawngte fel taka an awm theihna tura chhungkaw din hi a ni. Chhungkua hi mihring remruat chawp leh duh vang maia lo awm a ni ngawt lo. Pathian ta a ni a , a khawngaihna hnuaia luah thei chauh kan ni a, a innghatna lungphum pawh Isua a ni tur a ni. Siamtu Pathianin mihringte khawsakna laipui ber atana a pek leh a din a ni  a. Chu chhungkua chu remna leh muanna hmun, taksa leh thlarau tichhe thei thil laka invenna hmun, inthen darh lova pumkhat kan nihna tura kan kulhbing sang, Pathianin a lo ruat chu a ni.

          Mi tin mai hian mahni chhungkua hi kan ngai hlu theuhin a rinawm. Khawvel chhungkua hei zo zai zingah hian mahni chhungkua bil chauh lo chu chhungkaw dang kan nei  reng reng lo tih han chhut chuan chhungkaw hlutna leh pawimawhna a lo langfiah thin a ni. Kan in chu a chhia emaw a tha emaw, kan chhungkua chu kan chhungkua a ni a, kan lungngaih leh lawm lai pawhin kan hre reng thin. Khawvela kan nun hlim lai ber chu kan chhungkua hlim lai ber kha a ni fo. Miin thlamuanna zawngin khawvel hel chhuak mahse a chhungkuaa a lo let leh hunah chauh a duh a hmu ang tiin ziaktu pakhat chuan a lo ti a ni.

 Chhungte khawsak dan tur rel fel rawh

          Chhungkaw tinte hian tu emaw tal chu puipa kan nei theuh va, chhungkaw nun nawm leh nawm loh pawh  chhungkaw puipa ro rel danah a innghat fo thin. Kan thawhchhuahin chhungkaw tan in tha leh lo tha tam tak  kan lei thei a, kan fate nun tha erawh chu suma lei theih chi a ni lo. Suma kan lei theih loh kan fate nun  khawsak dan tur chu eng tin nge kan reksak tak ang le?

1.     I inchhung kha I fate tan biak in hmasa berah chantir rawh  

          Pathian hian kan tan awmze nei takin hunbi min siamsak a, ni khat atan zel hnathawh tur pawh kan ruahman thin a nih kha. Chuti a nih chuan Pathian tana nikhata vawi khat tal chhungkaw bila tawngtaihona hun hi hman thin tur a ni. Chutah chuan Bible chhiar te, hlasak  te,tawngtai dan te, biak ina awm dan tur te zirtir thin i la. Pathian biak awmzia leh  Pathian tih dan an lo thiam dawn a ni. Pathian thu atanga kan fate nun kaihhruai hi kan tih hmasak ber tur leh an nun kawng tur rel felna atan thil pawimawh tak a ni.

2.     I inchhung kha thununna fel tak nen enkawl rawh

        Chhungkaw enkawlna kawngah hian thununna tel lova hmangaihna ringawt chuan zalenna sualah a hruai lut thin a, hmangaihna tel lova thununna ngawt lah chuan chhungkua chu inhlauh tawnna hmunah a chantir thei bawk avangin chhungkua chu mumal taka hmangaihna leh thununnain a phuar khawm tur a ni. Leia kan rosumte hi vanah kan chhawm thei lova, vana kan chhawm theih awm chhun chu kan fate hi an ni.

3.     I chhungkua kha I fate nunchan zirna hmasa ber anih hre reng rawh

         Kan fate bulah kan nunin Pathian ropuizia kan lantir fo tur a ni. Kan tu leh fate hian thahnem ngai taka kan tawngtai lai leh kan che vel hi an hmuin an hre fo tur a ni. Bible chhiar lai te, inkhawm kan ngaih pawimawihzia te, Pathian hnena thilpek chi hrang hrang kan pek dan te hi kan fate hian hria se, an thil hmuh leh an hriatte hian an nun a kaihruai hma em em a ni. Kan chhungkua atangin taimakna te , tawngkam mawi leh mawi lo pawh an zir chhuak a . Fate hmuha inhauh fo te, kan chunga thleng tur atana kan duh loh tur anhla mak tak tak kan ka atangin a chhuak tur a ni lo. Tin, naupang thang lai hian kan thu aiin mi dang thusawi hi an zawm awl hle a, mi dang an entawn zung zung thin avangin zahmawh sawi chingte,thu duk dak lo sawi chingte chu in leng atan  an tha lova, kan hnar ngam tur a ni.

4.     I inchhung kha I thlaraumi nihna lantirna hmun tur a ni

       Pawn lama thlaraumi nih aiin mahni inchhungkhura thlaraumi nih a har zawk an ti thin. Pa thenkhat chu anmahniin  Pathian thu  awih  hle siin an fate erawh veng mawng lamah zu an rui a, ruk an ru a. An pate Pathian hi an Pathianah an pawm thei thlat lo thin hi  a pawi tak zet a ni. Kan Pathian thuawih

dan leh kan thlaraumina hi kan inchhung a thleng phak thin lo a ni tih a tilang a ni.  Mahni inchhung kal pel zawnga thlaraumi nih chu lemchang mai kan ni a,

Chhungkaw pawn lama zaidam leh nun nem em em mahni inchhunga thlahrang

ni leh lawi si te pawh kan awm ta ve ang. Chhungkua a nuam chuan lei hi vana

kan chantir a ni mai a. Kan chenna in leh buangrua chu a tha tawk lo a ni thei e, nimahsela, chhungkua nun a hahdam chuan chu aia hlu a awm chuang lo.

5.     I chhungkua kha zir chiang rawh

          Kan fanaute awm dan hi kan zir chian a tul hle a, nitina an thil tih thinte, an thian kawm thin te, khawiah nge an kal thin tih te hre tur chuan an tan hun pek tam a tul bawk thin. Kan hnena engkim an sawi ngam theih nan kawmngaih an ngai a. An mizia, tuizawng, duhzawng an neih dan azirin enkawl dan thiam a awl bik. Nu leh pa hnena an sawi duh loh leh an sawi ngam loh hi thiante bulah chuan zep nei lovin an sawi chhuak mai thin. Kan fate thian thaa kan siam theih tluka hlu leh man to a lo awm chuang lo.

Tlangkawmna

              Kohhrana hotu ni tur pawhin  mahni in chhung khawsak rel fel thiam mi nih a pawimawhzia thu hi ITim. 3:4- 5 ah, “zahawm taka fate kilkawia mahni in chhung khawsak rel fel thiam mi a ni tur a ni. (Miin ama in chhung khawsak mah a rek fel thiam si loh chuan, Pathian kohhranho engtin nge a enkawl theih ang?)”tiin min hrilh a ni. Mahni in chhung atangin bul tan leh i la, kan lo pian chhuahna chhungkua aiin tuna kan enkawl mek chhungkua awm dan tur rel fel hi a pawimawh zawk.

             Hmanlai B.C 300 vela China Lal Chee Howang-a kulh ropui sak, ‘The great Wall of China’ an tih chu a ropui hle a. China khawpui chuan hmelma lakah inhumhim nan an lo hmang tawh thin a. Nimahsela, an hmelmate khan eng vang in nge an hneh tak kha? An kulh bang an tichhia a ni lova, an tichhe thei bawk hek lo.  Kulh kawngkhar vengtute sumin an tham lungawi a, kulhah chuan hmelma an lut a, khawpui ropui tak chu an hneh ta a ni. Inhumhimna bang chu tha hle mahse a chhunga chengte an nun dan a fel tlat loh chuan awmzia a nei lova, innghah nan a tlak hek loh. Kan finna te, felna te leh kan hausakna te hi hluin tangkaina nei ve bawk mahse innghah nan tak tak a tlak lova, a chhunga cheng kan fanaute nun hi a fel hmasak phawt a tul a ni. I chhungte khawsak dan tur rel fel rawh eng tik niah emaw chuan i la thi ngei dawn si a. 

MALAYSIA MIZO COMMUNITY CHANCHIN LEH LAWMTHU SAWINA

MALAYSIA MIZO COMMUNITY CHANCHIN

Thu Hmahruai

Malaysia Mizo Community chuan Pathian kaihhruaina avângin Kum Sâwm cham a lo thleng ta der mai a, ni tina MMC leh a mi te kaihruaitu Jehova Pathian hming fakin awm rawh se. MMC Chanchin sawi tûr hian ka hriatna leh ka finna in a tlin lova, Kum 10 chhûnga Pathian hnên aṭanga kan dawn malsâwmna sawi chhuak leh vek tûr chuan ka mihring nihna hian a phak lo ani tih hre reng mah ila, committee in mawhphurhna min pêk chu ka theih tawpin ka rawn thlasik mau chang puah pui phâwng phâwng mai dâwn a ni. Sawi sual leh hriat fuh loh a awm pawhin thang khum dân tlang huat loh kan ti a ni ang chu!

Malaysia Mizote leh MMC Bultan Dan (Background and Origin)

Malaysia Mizo Community Bulṭan dan hi Kawl ṭawngin (ေကာလဟာလ) tia an sawi angin Thu Lenglawng hi a tam êm êm mai a, Mi ṭhenkhat chuan MCF aṭang kan inṭhen chhan hi Sum leh Pai vâng a ni a, inchhuahchhalnate a awm bawk a ni titein an lo sawi ve bawk a, Sum leh Pai vâng a ni lo ve tih hi uar takin ka sawi duh a ni.

Mizo tam takin 1990 hnu lamah Malaysia tlak thlak nachang lo hre mahse 2003 hnu lamah chauh Sakhuana lama insuihkhawm leh rawngbâwl tlan nachang an lo hre ve chauh a. Tichuan mi ṭhenkhat ṭhahnem ngaihna avângin Mizo Christian Fellowship (MCF) tiin January 25, 2004 a ṭang khan hmun khatah rawngbâwl tlangin an lo insuihkhawm a ni. Chin unau dangte chuan 2002 chho atangin UNHCR bela refugee status dîl nachang lo hre tawh mahse Mizo tam tak chuan tih chi ah an lo ngai lo niin a lang a, August 15, 2007 ah chauh mumal takin Mizo Refugee Organization (MRO) tiin a lo ding a ni. Mizo tawhphawt chu MCF ah lawiin sakhuana rawng an bâwl tlang a ni.

December 2006 ah MCF a Mizote chuan Alliance of Chin Refugees (ACR) ah kût hmang ve tûra an beisei hnuin Pu Vanlalsawma chu hma la tûrin ruat a ni. ACR chuan Mizo tih chu Mizoram aṭang rawn kal nia a ngaih tlat avângin a hnuaia member atân a pawm thei lova, MCF President Pu Immanuela Khiangte chu hruaitute rem tih nain Pu Vanlalsawma chuan ACR ah Official Lehkha a ziaka, Malaysia Mizo te hi Myanmar Chin State-ah te pawh tam tak kan awm thû te, Chin hnam zinga hnam khat kan nih thû te, Mizo kan nih avânga Mizoram mi kan nih loh zia lehkha a theh luh hnuah ACR chuan dân a lo neihsa angin Mizote chu thla 3 a lo enthla a, tin April 2007 ah Mizote chu ACR Member nghet ni tûrin a pawm ta a ni. Chutia membera a pawm hnuin MCF hruaiturte chuan ACR a Palai (Delegate) kal ṭhin tûrin Pu Vanlalsawma leh Pu Lalhmingliana (Peter L.S Lian)te chu a ruat a ni. Hei hi MRO din hmaa MCF Mizo ten ACR kan lo zawm dân chu a ni.

Kum 2007 atang Mizo tam takin Malaysia-a refugee dîl nachang kan rawn hre ve a, kum 2007 chawhnu lamah phei chuan a hlawm a hlawmin Malaysia kan thleng ve ta hlawm a. MRO chuan ACR a awm chu duh tawk lovin ACR leh CRC te anga UNHCR recognition hmuh dan kawng dap tha a tih avangin ACR aṭang chuan ban a rel leh a August 2007 ah ban dîlna lehkha a theh lut ta a ni. Sakhuana kawngah chuan MCF ah lungrual takin ro an rêl tlang reng tho.

Chin unau dang nêna insuih khawm ṭha ti zawk member ṭhen khat chuan ACR-a Mizo identity chu “Ni khat ni ni ah Mizo hian ACR/CRC a kan let hun a la awm tho tho dâwn a, mi thar ni ṭha leh lova member hlui kan nih nân” tiin an lo chelh nung ṭang ṭang a. Pu Vanlalsawma chu hma hruaitu ber a ni a, 2008 April thlaah MCF in a hranpa a kawmna an neih phah nghe nghe a ni.

MRO chuan March 2008 ah Mizoram zaithiam kovin Gospel Concert a buatsaih a, a hnu lamah rawngbâwl chhunzawmna tûr sum a awm tawh loh avângin MCF hnuaiah a in tulut leh ta a. MRO chu MCF in chelhin MRO Coordinator hlawh pawh MCF a memberte sâwma pakhat tling khâwm a pêk a ni chho ta a ni. 2008 May thla aṭangin Pu Lalrinsanga chu ACR a Vice Chairman dinhmun a thu tûrin Chin mipui aiawh kalkhawm ten an thlan avângin ACR ah pawh Mizote kan tlangnel phah a ni.

Hetih chhûng zawng hian ACR a awm Mizo te pawhin MCF ah an lungawi mai ni lovin MRO, ACR leh CRC member Mizo zawng zawng pawh MCF aṭang enkawlpui tûrin leh MCF chu Malaysia a awm Mizo zawng zawng Umbrella Organization anga neih an dîl fova, maktak maiin MCF EC rorel chuan a pawm rem thei lo a ni.

Kum 2009 April thla a lo her chhuah chuan ACR Annual Election neih a lo hnai avângin member organization/community zawng zawngin delegate pêk luh ṭheuh tûr a tih angin ACR Mizo awm chuan MCF ah kalin President Pu Hualsailova leh Pu Khalhliante an kâwma, ACR a Mizo represent tûrin MCF in a duhzawng mihring thlah tûrin an ngen a. MCF in a duhzawng a theh luh a ACR Mizo memberte MCF memberte an ni e tih a hriatpui theih chuan a thawk lai Pu Vanlalsawma leh Pu Lalrinsanga ten hmun kian an huam thû pawh chiangtakin an sawi a ni. Mahse chu ngenna chu ni 19 April 2009 MCF EC rorêl chuan a hnawl ta a ni. ACR hnuaiah Mizo 700 velin membership an lo siam tawh avângin hruaitute chuan an memberte han pamtul pui ngawt chu ṭha a tih loh avângin Committee din a ngai dâwn a, chu chuan Mizote lungrualna a ti khawlo thei a ni tiin MCF chu ngaihtuah ṭha leh tûrin a ngen nain, MCF hruaitute hnen aṭanga thu dâwn chu “Mimal tinin zalenna kan neia, in duh chuan Committee chu in din thei a lawm,” tih a ni bur mai si a. Tichuan, April 20th 2009 ah ACR room ah mi 12 kal khâwmin Committee din a rêl ta a ni. Chu rorêlna ah chuan Pi Duhhnemi, Pu Runchuana, Tv. Maenga, Pu Zama, Pu Vanlalsawma, Pu Sangpuia te leh midang dang kalkhâwm an ni. MCF member ṭha ni tûrin kan in zirtir ang tih pawh an rorêl zîngah chuan a tel a ni. ACR aṭanga thla tin kan dâwn sâwma pakhat pawh MCF ah kan pe ang tih pawh a tel.

Chutia Committee a din hran takah chuan an hlauhthawn ang ngeiin sawi neuh neuh atamin in hmuh fuh lohna a thleng ta ngei a. Tun hmaa MCF a vui ngam lo pawhin an lung nih lohna sawina hunah an hmang ta a. Chumi zingah chuan Thlarau rawngbâwlna lama duh thawh tam takin hma thar laka Lalpa rawng bâwl an duhna chu kawngka hawnsak in an lo awm ta a, chu chuan tuna kum Sâwm tlingta MMC/MMF hi a hring chhuak ta a ni.

April 20,2009 a neih meeting hmasa berah chuan pâwl hming atân Mizo Refugee Community (MRC) tih rem an ti. April ni 26 nia committee meeting ah chuan inkhâwm hran rawtna a rawn awm ta a, Seminary aṭang Sayama Laldinpuii’n Wesley Methodist Kohhran hnên aṭanga pur chawk dân tûr a rawn duang ta a, amah chu dawr tûra ruat nghal a ni. Kal khâwmte’n an thil tum chu Pathian hriatpui leh kaihhruai ngei nia an hriatna leh Thlarau pawlna awma an hriat avângin huai takin hma an la zêl a ni.

Thlarau rawngbawlna a tang inthenna 

MCF leh MMC kan inthen dân hi kum 1996 a Methodist leh Wesleyan inṭhen dân ang deuh kha a ni a. Kum 2007-2009 hun laia MCF Pastor chu Rev. Thuamluaia (Methodist Kohhran Pastor) a ni a, MMC member zîngah Evan. Kawllianhnuna (Wesleyan Kohhran Evangelist) te nên Mizo zawng zawngte hmun khata rawngbâwl zaho kan ni a. Tichuan, anni pahnih hi Kum 2002 aṭang tawh khan Pathian thûah an lo in do nasa hle a chuvângin an hmanlai Chanchin (History) tlem han sawi ila, Pastor Thuamluaia hi Kawlkulh khua Methodist kohhrana Pastor-a a thut lai khan Evan. Kawllianhnuna chu Camping nei tûrin Kawlkulh khuaah a lut a, Camping a neih chhûngin Pastor thuamluaia chuan Methodist biak inah a memberte Camping a neihpui ve bawk . Chutianga hman aṭanga Pathian thûa lo in do ṭhin an nih avângin Fellowship pakhatah rei tak rawng bâwl ho thei an ni lova thalarau rawngbâwl zaho na aṭang pawh kan lo inṭhen ta a ni. Tin, nichina ka sawi tak ACR atang Community ding hrangte nên khan insuihkhawmin Malaysia Mizo Community leh Fellowship tiin kum 2009 aṭang kan lo ding hrang ta a ni.

1 Petera 3:8 “A tawp berah chuan in zain rilru hmunkhatin awm ula, inlainat tawn ula, unau angin inhmangaih ula, khawngaihna nei ula, thuhnuairawhlin awm rawh u.” tih a nih angin Krista Isua ringtu zawng zawng zawngte hi Unau vêk kan nia, rilru hmunkhata kan awm pawh a ngai a ni. Tin, ramthumna beisei vânga rawn kal kan ni a, hetinga Fellowship hnihthum taka Pathian kan fak thei te hi mi vannei tak kan ni, thil kal tawh zawng zawng chu theihnghilhin Pathian lam chauh kan en theih ka beisei. Chuvângin Malaysia a chêng Zofate hian Ram thumna chuah ni lovin Ram lina (Vanram) kan thlen ngei theih nân I beisei ṭheuh bawk ang u. Tita 3:8 “Pathian ring tawhte chuan thil tha ti zel turin ngahtuah rawh se.” a tih angin Kei ni ringtu zawng zawngte hian kan rawngbâwlna kawng tinrengah thil tha ti zêl tûrin I ngaihtuah zâwk ang u. Kan Pathian hming fakin awm rawh se.

ACR nen thawh dunna

May 14, 2005 khan Alliance of Chin Refugee (ACR) hi din a ni a, ACR hnuaiah hian Community 17 vêl an awm a, MMC chuan April 2009 khan ACR chu a hnuaia member pakhat angin tun thleng kan lo zawm ve ta a ni. MMC chuan Memberte tan Mahniin Community Card kan insiam loh avângin ACR Mizo tiin kan memberte chuan ACR ah Card an siam zel a ni. Tin, Kum 2009, 2010 leh 2013 Mobile Registration hun lai pawh khan kan member ACR Card vuan zawng zawngte chuan hamṭhatna kan lo chang hlawm a ni. 2009 aṭang 2019 thleng kan Community chuan ACR Meetinga telpui tûrin Delegate mi (2) zêl kum tin kan inthlang ṭhin a, ACR chuan Clinic, Mangtha Puanthuina, Course chi hrang hrang leh School etc. a hawnnaahte MMC member-te chuan hamṭhatna kan hmuh mai bakah kan hlawkpui hle a ni.

ACR a kan Member Executive Committee Member Nihna lo chelh tawhte:

1.Pu Lalrinsanga 2009-2011 Coordinator, Vice Chairman leh Information In Charge
2.Nl. Lalbiakzovi 2011 ah Editor leh 2012 Information In Charge
3.Pu Ricky Kaplianngura 2012-2014 Chairman
4.Miss Lalhmachhuani 2012-2014 School In Charge
5.Pu Lalbiakchhunga 2014-2016 Information In Charge
6.Rev. Khamh Tin Uka 2013-2016 Advisor

MMC INKHAWMNA

May 7, 2009 ah MRC inkhâwm vawi khatna chu ACR ah neih a ni a, mi 20 chuang an inkhâwm thei a, Evan. Kawl Lian Hnuna’n Pathian thuchah a sawi a, Pu Thlamuanpuia chu inkhâwm hruaitu a ni. May ni 14^th  2009 a MRC inkhawm vawi hnihna chu ACR School a neih a ni a, Rev. C. Kapa Malaysia a cham lai tak nên a in tawn avângin a inkhâwm ve a, inkhâwm banah meeting thut nghal a ni. Tahchuan Rev. C. Kap’n Wesley Methosidt Mission sum dîl theih a nih tûr thû a sawi avângin kan mamawh phuhrutu atân dîl rem kan titlang a, Rev. C. Kapa’n hma min lakpui nghal avângin Methodists Kohhran chuan biak in hawh man min rawn tumsak ta a ni.

May 30, 2009 MMC rorêl thukhâwm chuan inkhâwmna in tûr zawn a rêl thlu a, Bukit Bintang-a Mara Christian Fellowship inkhâwmna bula Korea biakin pawh han en in, hmun tin a dap hnuah tunhmaa kan inkhâwmna PUDU ah thla khatah RM 1400/- tûrin a rêl thlu leh a ni. Chu hmun chu Miss Wongi Office chunga hmun kha a ni a, in ruak mai a nih bakah a chhûngah engmah a awm lova, deposit tûr member remchangte hnên aṭang sum apuk hnuin chawlhkar khat chuang hnatlângin an cheibawl a, vawi khat nân June 21st 2009 ah an inkhâwm ṭan a ni (MMF Inkhâwm vawi 3na a nih chu). Tun thleng a Inkhâwm nân kan hman mek kan Biak In hi August 19, 2012  aṭang khan kan lo inkhâwm ṭan thei a ni.

August 23, 2009 EC meeting member 21 kal kahwm tên vote lain vote 20/1 a an hneh avângin Mizo Refugee Community leh Malaysia Methodists Fellowship chu in fin khâwma Malaysia Mizo community anga body pakhat hnuaia din rem tiin, chuta ṭang chuan kan pawl hmingah Malaysia Mizo community (MMC) tih tûr a ni tiin 2010 January ni 14 a endik, February ni 7, 2010 a mipui nemngheh dan dinglaiah pawh kan hmang a ni. Malaysia Mizo Community (MMC) tih hming pua meeting in a nemngheh ni chu August 23^rd , 2009(Sunday) a ni.

MMC Din Hmun (Foundation)

MMC chuan a din hlim atangin Lalpa Pathianah chauh chakna la a, Mizo te tan all-round development thlen thei tûr hma engpawh laksak a duh a, a kal dân tûrah chuan servant leadership a ni tûr a ni. MMC rawn beltu tupawh angkhat vêkin a rawng a bâwl sak tûr a ni a, mi lian leh mite thliarhran tûr a ni lovang ti tein MMC kal dân tûr chu a tir aṭanga duan a ni.

A Thil Tumte (Objectives)

1.Pathian ropui nâna Chanchin Ṭha hril.

2.Krista thuhretu ni tûra mite buatsaih.

3.Hmasawnna kawnga member-te hamthatna ngaihtuah.

4.Chhungkua, kohhran, community, ram leh hnam tana mi tangkai ni tûra mite buatsaih.

5.Member-te zirna lama hmasawn zêl tûra hmalak.

MMC/MMF Rawngbawlna Peng Hrang Hrangte: 

1.EVANGELISM

Pathian thûa memberte hmasawn leh tih chak chu a tum ber a ni a, mahse Pastor neih loh vângin rei tak chhûng chu member zing aṭanga in fuihtawnna leh Pathianthu hrilnain hun hman a ni. Evan Kawl Lian Hnuna chu khaipa leh thuhriltu bera ngaih a ni maia, Evan Thlamuanpuia nên Cemaron Highland te tlawhin rawng an bâwl. 2009 chhûng ngeiah Port Klangah Branch din a ni. MMC EC meeting in evangelism lam hmasawn nân Evan Kawl Lian Hnun chu fulltime rawngbâwltu atân Oct 4, 2009 rorêl chuan an ti tlua, November thla aṭanga ṭanin thla 6 term tûra rorêl a ni a, a hlawh atân RM 800 a ni.
Evan Kawllianhnuna chuan March 9, 2010 khan Ramthumna lamah min thawhsan avângin Evan. Thlamuanpuia chuan a ai a awh a ni. Tin, MMC Inkhaihruaina Dân Bu chu Kum 2014 a revise naah Evnagelish tih chu Tirhkoh tia thlak a ni a, Evan. Thlamuanpuia chu Tirhkoh tiin Kum khat a thawka chu mi hnu 2016 aṭang 2019 tun thleng hian Tirhkoh thawhtu kan awm tawh lo a ni.

2.PASTOR

Vawi tam tak EC committeein a rêl tawh ang leh kan dân dinglaiin a rêl angin Pastor kawlram aṭanga koh dân tûr ngaihtuah a ni a, Feb 21^st , 2010 a mipui inkhâwm vote 77 ah Rev. Khamh Tin Uk an vote 38 hmua mipui duhber a nih avângin a koh dân tûr bawhzui nghal a ni. Myanmar Wesleyan Kohhran Hakhalay-a District Chairman thawk mek Rev. Khamh Tin Uk-a chu May ni 16^th 2010 tlailam dar 3ah Pathianin MMC kaltlanga rawng bâwl tûrin Malaysia a rawn hruai thleng ta a ni. Malaysia Mizo Fellowship te nen a kum 6 chuang rawng kan bâwl tlang a, Visa lama harsatna kan tawh avângin November 1, 2016 Tawhleh zingah Kawlram lam min thlawh haw san ta a ni.

Tin, Malaysia Mizo Fellowship te chuan Myanmar Wesleyan Kohhranah Pastor kan dîl leh a, Wesleyan Conference Meeting chuan Malaysia Mizo Community leh Fellowship-a rawngbâwl tûrin Rev. Henry Lalhmuakliana an rawn tir a, Pathian kaihhruaina a zarah May 13,2017 Inrinzan dar 11:45 khan Malaysia tluang takin a rawn thleng a, tun thleng hlim takin rawng kan bâwl ho thei a ni.

3.CHILDREN TRAINING SCHOOL

Pu Trey L. Fanai (Pu Tluanga) ṭhahnemngaihna chuan Genting Klang a Mizo naupang 20 chuang zirna fumfe nei lo te tâna zirna buatsaih sak duhna chu MMC Committee-ah July 2009 aṭang a rawn thlen a. MMC chuan Mizo naupang ho tâna hmalaksak chu thil ṭha nia a hriat bakah changkanna leh Pathian rawng bâwlna ngei nia a hriat avângin Pu Tluanga te nupa leh Tv. Mama te chu mawhphurhna a pe nghal a ni. Pathianin MMC thil tum chu malsâwmin August thla khan UNHCR lam atang SPF fund dîl theihin a rawn chhawp chhuak a. Tichuan 1st September 2009 khan Genting Klang a Children Training Center chu khual zahawm thahnem fe nên hawn a lo ni ta a ni. Hei hi Malaysia a Mizo school awm chhun a la ni.

Tin 2010 ah Mizo Refugee School (MRS) tiin School Board din a nia, MRS chu UNHCR lam a tanga Learning Center tia thlak tûra thurawn pêk a nih avângin MRS aiah MRLC Mizo Refugee Learning Center tih hming chu June 18, 2011 EC meeting chuan a lo thlak ta a, tûn thlenga kan School hman hi a lo ni ta a ni.

Mizo Refugee School (MRS) Pudu a kan din aṭang hian Genting Klang lama kan School hian ngaihsak a hlawh tawh lem lova, tunah chuan hnam dang unauten an changchawi ta a ni.

MRS a din aṭang MRLC thleng Principle lo thawk tawh te chu:

1.Sir Henry Khama

2.Sir Rochhunga

3.Sir Ricky Kaplianngura

4.Miss Mang Za Kimi

5.Sir Israela

6.Miss Zoliani

7.Miss Emma Laldinmawii

8.Sir Joseph Lalhlira te an ni.

4. Naupang Mizo Tawng Zirna

Tv. Rochhunga’n MMC din hlim aṭang a hna kalsan in volunteer a rawn thawhna rah chhuah leh Pathian kaihhruaina zarah Pudu a awm Mizo naupangte tân Mizo ṭawng zirna nitin Quarters-ah neih a ni a. Mi thahnemngai te tlawmngaihna zarah kan naupang ten ram dang pawh thleng se kan hnam ṭawng an thiam tûr hi hnam rohlu kan ti lo thei lo a ni.

5. Chanchin Tha Ruaipui

Memberte thlarau lama kan hlawk pui theih nan tiin 2011-2019 Chinese New Year chhungin MMF hminga Chanchin tha ruaipui buatsaih a ni. Chung kan Ruaipui Speaker-te chu:

Kum 2011 Evan. Zirliansanga leh Evan. Office Kailiana

Kum 2012 Evan. R Lalthantluanga

Kum 2013 Evan. Hmingthanzauva

Kum 2014 Evan. R Lalthantluanga

Kum 2015 Evan. Zirliansanga

Kum 2016 Rev. Khamh Tin Uka

Kum 2017 Evan. John Lianhnuna

Kum 2018 Evan. John Lianhnuna

Kum 2019 Evan. CB Lalzarliana te an ni.

6. Naupang Sunday School , MMCW leh MMCY

Malaysia Mizo Fellowship chuan kan naupangte Pathianthu ah leh Pathian rinna a an than len theih nân Sunday School a buatsaih saka, kan naupangten hma an sawn puiin kan hlawh tling viau bawk a ni. Tin Kum 2010 ah Malaysia Mizo Community Women(MMCW) leh kum 2012 ah Malaysia Mizo Community Youth (MMCY) te an rawn ding a ni.

7. Mi Mangang Tanpui

MMC chuan hlawh neiin tumah a la chhawr thei lo nachungin hruaitute thahnemngaihna zarah vawinni thlengin damlo buaipui tûr an awm reng a, Pathianin hruaitute hna thawh chu malsâwmin damlo tam tak an buaipui piah lamah UNHCR lam thlengin mi tamtak kan in hruai lut thei tawh a ni.

Mi tam takin MMC ah himna, chawlhhahdamna leh Lalpa hmel an hmu tawh niin kan hria a, chu kan lâwman chu van lam mi te pawhin min lâwmpui ngeiin kan ring tlat a ni. Kum 2017 leh 2018 ah te hian kum dang aiin kan member zînga harsa tak takte ṭanpuina kan nei nual a ni.

8. Malaysia Mizo Fellowship Ṭawngtai Inkhawm

March 4, 2018 MMC thalthar EC meeting chuan thawhṭan zân apiang Malaysia Mizo Fellowship hminga ṭawngṭai inkhâwm chu Biak ina nei thin tûrin ro a rêl a, March 12, 2018 thawhtan zân aṭang hman ṭan a ni. Tin, Kum 2019 January 6 Committee rorel thu tlukna angin Kumin kum thar aṭang MMF thawhtan zân ṭawngṭai inkhâwm chu Pastor Quarter ah tun thleng kan hmang chhunzawm thei a ni.

9. Malaysia Mizo Fellowship Mission Rawngbawlna

Malaysia Mizo Fellowship hnuaiah Mission Board chu May 13^th , 2012(Sun) khan din ṭan ani a, Misssion Chawmna hmun leh Chawm zat erawh chu kum tiin in a in ang lo a ni. Kim 2012- 2019 thleng kan Mission Chawmna hmunte:

1.The Truth Evangelical Fellwoship (TMEF)

2. Myanmar Evangelical Fellowship (MEF)

3. Presbyterian Church of Myanmar (PCM)

4. Evangelical Methodist Church (EMC)

5. Wesleyan Church of Myanmar (WCM)

6. Grace Evangelical Ministry (GEM) te an ni.

January 8, 2017(Sunday) Committee chuan chuan Mission Board chu a hrana ding tawh lo vin EC in chelh mai tûrin thutlukna a siam a ni.  

Thupha Chawina

May 6, 2018(Sunday) Committe chuan Tin Jubilee Organizing Committee mi 6 a ruat a, Pastor, Chairman leh Secretary te chu ex-officio te an ni. June 24, 2018 (Sun) ah Organizing Committee-te chu meeting neih a ni a, Outdoor Sporta hman dân te, Indoor inkhâwma hman dân tûrte, Jubilee Souvenir Lehkhabu chhuah ngei tûr te, Article rawn thawn tûr te leh Jubilee kawr siam tûr te pawh an rêl a ni. MMC a coordinator thawk mêk Pu Alex Lalagent Thanga chu Australia lama thlawk chhuak mai tûr a nih avângin April 7, 2019 EC Meeting chuan aiawh atan Clerk thawk mek Pu Peter Thanga a nemnghet a, tin Clerk thawktu atân Pu Joseph Lalhlira MRLC School a Principle thawk mêk chu Clerk thawk tûra nemngheh a ni bawk a ni. April 14, 2019 Sunday chhûn MMF inkhâwmah Rev. Henry Lalhmuaklianan In Charge inhlanna a buatsaih a ni.
Nikum lam MMC EC meeting chuan Clerk nei tawh lo a in saizing tûrin a ngaihtuah hnuin kum 2019 ah Tin jubilee hman kan tum thu leh jubilee lehkhabu pawh chhuah ngei tura Committee in a pass avangin Clerk neih leh rem kan ti tlang a ni, April 14, 2019 Jubilee Organizing Committee rorel chuan Jubilee Souvenir lehkhabu pawh Bu 100 chhuah turin leh Jubilee Pathian biak inkhawm naah a thlawna sem tûr tiin thu tlukna a siam a mahse a hun taka jubilee souvenir lehkhabu kan chhuah tir thei lo hi pawi kan ti hle a ni.

Article hi kan member ziak mite leh Ram thumna thleng tawh te hnen atang rawn thawn turin sawmna kan thawn chhuak a, lehkha rawn lut hi Pudu a tang  1, USA atang 2, Australia atang 1, Canada atang 1, Myanmar atang 1 chuah a rawn luh avangin a beitham em em mai a, chuvangin MMC Secretary Pu Lalnunpuia chuan ama thahnem ngaihnain Chanchin tha ruaipui speaker, leh MMF a rawn lo bawl tawh te hnenah Article rawn thawh turin a sawm ta a ni. Sawmna tlawm tak mai chu an rawn ngai pawimawh hle a an zavaiin in an hun chep tak karah an rawn thawh liam liam mai a ni.

“Souvenir lehkhabu chhuah turin Committee in pass tawh mahse MMC Office staff-te tan chuan thil khirkhan tak leh hau tak lutuk a nih thu leh chanchin kimchang lo taka chhuah ai chhuah loh law law mai a tha zawk e,” tih chu Clerk ngaihdan a ni bur mai si a, chuvângin a hun takah a rawn chhuak thei ta lo hi pawi kan ti hle a ni.

April 28, 2019 (Sunday)Emergency EC Meeting chuan Pu Lalnunpuia (Secretary) chu MMC Chanchin sawi tûrin mawhphurna a pe a, Tin Jubilee Pathian biak inkhawm programme-ah MMC Chanchin tawi tiin Clerk chuan Committee rorel dan ni lova “tawi” a rawn belh chungchângah leh Master of Cremonies (MC)a kan hman pakhat chuan “A hun hi limit a awm lova, tawi tih a inziak a ni a, a sawi tawi thiam viauin ka ring” tih ṭawngkam chuangtlai a rawn hman avângin pawi ka ti hle bawk a ni.

MMC Hminga Lawmthu Sawina

MMC Jubilee ah hian lo sul sutu kan hruaitute zawng zawng hnêah thinlung takin lâwmthu kan sawi duh a, harsatna tin reng hmachhawnin an lo thawhrah chu keini chuan an zar kan lo zo a ni ber mai a, Chanchin tam tak min rawn hrilhtu a bik takin Pu Lalrinsanga (USA), Pu Vanlalsawma (Australia) leh Evan. Kawllianhnuna (USA)te hnêah lâwmthu ka sawi duh a ni. Tin MMF a  pastor lo thawk tawh Rev. Khamh Tin Uka (USA) hian a rawngbâwlna aṭang a dawn thlaichi RM 500 chu MMC Jubilee tân tiin March 25, 2019 khan min rawn thawn a, a chungah pawh kan lâwm hle a ni.

MMC Jubilee Sport day pawh May 1, 2019 ah hlim takin kan hmang zaho thei a, Game Leader te chuangah pawh lâwmthu kan sawi a ni.

Tichuan, Jubilee Indoor inkhâwmna hmun tlawmngaia min zawn saktu Pu Alex Lalagent Thanga leh Pu Peter Thanga te hnênah pawh kan lâwm hle bawk a, Music Instrument lama mawhphurhna kan pêk anga tlawmngaia rawn thawkchhuak tute Pu Peksanga, Pu Zohmingsanga, Pu C Lalenkawla, Pu Rohluchharliana leh Tv. John Laltanpuia te chungah pawh lâwmthu kan sawi bawk a ni.

Jubilee Outdoor Banner, Indoor Banner, Souvenir thlalakna tur Red Carpet te tlawmngaia rawn siamtu Pu Vanlalnunpuia leh Pu Lalnunzirate chungah pawh lâwmthu kan sawi bawk a ni.

Jubilee indoor naa Pangpar Mawi tak mai rawn hlantu MMCW leh mawi taka min rawn khawi saktu Pi Lalbiaklawmi chungah pawh lâwmthu kan sawi a, MMCW nuho nalh loh hlau em em a an hun hlu tak senga a thlawna rawn cheitute Pi Madiki, Nl. Thangtei leh Nl. Mami te chungah pawh kan lâwm hle bawk a ni.
Kum 2010 a tang tun thleng MMC/MMF tan rawngbawltu Pastor min rawn petu Myanmar Wesleyan kohhran hnênah thinlung takin lâwmthu kan sawi duh bawk a ni.

Video Shooting leh Camera mawhphurhna min lak saktu Tv. Colin Puia (Zofim Production) chungah pawh kan lâwm a, tin mahni Camera tlawmngai taka rawn thawh tute Pu Lalbiakchhunga, Pu Lalnunzira, Tv. Steven Zaithansanga leh Pu Lalpeksanga te chungah pawh lâwmthu kan sawi bawk. Kan Programme ngai pawimawh a Chanvo neitu zawng zawngin an rawn tih hlawhtling avângin an chungah kan lâwm hle bawk a ni. Kan Sawmna tlawm tak mai ngai pawimawha rawn tihlawhtlingtu ṭhenawm Fellowship Rev. Ramdinmawia, Rev. Dr. Ruth-i, Pastro Biakliana, Saya Hau Khat Mung (ACR Chairman), Pi LC Sangi leh NL. Lallawmzuali te chungah pawh lâwmthu kan sawi a ni.

A tawp kharna (Conclusion)

Tin Jubilee nia ka sawi tak zawng zawng beitham takah hian MMC chanchin chu a kim chang lovang tih ka hria a, mahse ka tih theih tawk anih avângin min pawm sak tûrin ka duh che u a ni. Tin, Ka hriat sual leh ka sawi sual pawh a awm mai theia, chungtiang a lo awm palh a nih chuan lung nih loh nân la lo tûrin leh a dik zawk min hrilh tûr che uin ka ngen mawlh mawlh cheu a ni. Kha zawng kha MMC Chanchin ka rawn sawi theih zawng chu a ni a, Inzavai chungah thinlung takin ka lâwm tak zet a ni e. Lalpa chauh ropui ber rawh se.

                                                           THE END