𝐑𝐎𝐑𝐄𝐋𝐍𝐀 𝐃𝐈𝐊

 "Nimahsela, rorêlna dik chu lui angin luang sela, felna chu luipui kang ngai lo angin luang rawh se." (Amosa 5:24)

Zâninah hian Kum hlui thlah zân nipah fawmin "Rorêlna dik" tih hmangin Pathian thu ka rawn thai leh nawk nawk dawn a, a hmasain chhiartu zawng zawngte chungah lâwmthu ka sawi duh a ni. Tin, dikna hi ringtute chuan kan ngai pawimawh hle bawk tûr a ni a, dik taka rorêl thiam pawh hi kan tih makmawhte zinga mi pakhat a ni. Mi kan hupphurh a, dik lo taka kan hnawl ṭhinte pawh hi ringtute tih atân mawi lo tak a ni a, chutiang kan ching a nih chuan kan saphing chaih a hniam hle a ni.

Khawvêlah hian khual zin mai kan ni a, nakina kan hawnna hmun tûr hi Pa hnên a nih thu chiang taka kan hriat a ngai a ni. Mihriangte hi tumah mahnitea awm kan ni lova a ni lo berah ṭhian emaw, chhûng khat leinate nên emaw pâwl emaw a huhova cheng kan ni ṭhin a ni. Chutia kan chen honaah chuan kan nun uluk a ngai a, fel taka dik taka kan awm erawh a ṭul tak meuh meuh a ni. Kan mihring puite hmaah chuan lemchan (drama) kan thiam viau pawh a ni thei e! amaherawhchu Pathian hmaah chuan lang lo tûra thuhrûk engmah a awm lo va, hriat loh tûra zêp engmah a awm hêk lo a ni. (Luka 12:2)

Zawlnei Amosa lehkhabu kan en chuan dik taka rorêl a pawimawh thu kan hmu thei ang. He dikna hi kan kristiannaah pawh hian chhawm nun zêl erawh pawimawh tak a ni. Chu dikna pawimawh zia chu khawia ṭang nge kan zir ang tih chuan kan chhûngkua aṭang kan zir tûr hi a ni a, chu thu chu Tirhkoh Paula chuan ti hian a sawi a ni, "miin ama in chhûng khasak mah a rêl fel thiam si loh chuan Pathian Kohhranho engtin nge a enkawl theih ang? "(1 Timothea 3:5) Chuvângin he rorêlna dik hi Pâwl hova kan sawi leh infuih hmain mahni chhûngkuaah kan in zirtîr tûr hi a ni ni reng mai a ni. Kan Pathian hming fakin awm rawh se! 

Eng kohhran, Pawl-ho emaw Society-ah emaw ro kan rêl dâwn a nih chuan dik tak leh fel taka kan rêl hi a ngai tak zet a ni, dik lo taka kan rêl chuan a hunlaiin sawi chhuah loh nimahsela nakin hnuah thu dik chu an rawn haichhuak leh tho a ni. 

Kum 66 kal ta khan, George Junius Stinney chu October 21, 1929 khan Pinewood, South Carolina-ah a piang a, amah hi Midum American mi a ni. Tin, an chenna chheh vêla cheng Mingo Hmeichhe naupang pahnih Betty June Binnicker kum 11 mi leh Mary Emma Thames Kum 7 mite thattuah an puh a, Court chuan thiam loh a chantîr hnuin June 16, 1944 ah thi tûra a chung thu rêl a ni a, Electric Chaira dep hlum a ni ta a ni. Chutia thiam loh chantîra tihhlum a nih chuan kum 15 mi chauh niin Kum 1987 hma zawnga an tih hlum zawng zawng zînga naupang ber a ni tia chhinchhiah a ni nghe nghe bawk a ni. Tin, hun a lo kal zêla a thih hnu kum 60 hnu (2014) khan Cout chuan Court chuan dik lo takin a chung thu rêl a ni tiin thiam a chantîr leh lawi si a ni. Chuvângin a hunlaiin dik lo takin rorêl mahsela a hnuah thu dik chu a rawn lang leh zêl a ni tih kan hriat a pawimawh hle a ni. 

Kohhran hruitu kan nih avângin vânram kan lût dâwn lova Isua ringtu kan nih avânga piang thar kan nih chuahin vânramah kan lût dâwn tih hi chiang taka kan hriat a ngai a ni. Mite hian kan chet zia leh kan nun hi an en reng a, hla siamtu chuan ti hian a lo ziak a,

"Mite'n min chhiar min thlir reng e, ka awm dân zawng zawng min hai lo

Krista nun mawi leh chanchin ṭha keimahah hian hmuh an chak ṭhîn."

Lal Davida chuan mi dik takte'n Lalpa hmel an hmuh tur chu ti hian a ziak a, "LALPA chu a fel si a, felna hi a ngaina ṭhin a, Mi dik takte chuan a hmêl an la hmu ang."(Sam 11:7) Zawlnei Amosan, "rorêlna dik chu lui angin luang sela, felna chu luipui kang ngai lo angin luang rawh se" a tih angin rorêlna dik kan ngainat ṭheuh theih nân a thu kan ziak zawng zawngte Lalpan kan zavai atân mal min sâwm sak rawh se!

 

𝐈𝐧𝐭𝐡𝐥𝐚𝐧 𝐓𝐡𝐥𝐢𝐫𝐥𝐞𝐭𝐧𝐚

 

           Covid-19 hrilêng karah tun anglai chu Dân chungchângah inhnialna a tam em em avângin he dân nêna inkungkaih article ziak tûrin ka rilruah a rawn lang hlawl mai a, ka theih ang tawkin ka rawn thai ṭial ve dawn a ni. A hmasain chhiartu zawng zawngte Krismas Chibai u le!

Malaysia Mizo Community chu 2009 khan din a ni a, Pathian kaihhruaina a zarah kumin hian kan dinkum pawh kum 11 a lo tling ta der mai a, Pathian malsâwmna ka dawng kan ti lo thei lo a ni. MMC kan lo din tirh aṭang tun thleng hian Member singtel dâwn lai mai ramthumna kan thlak chhuak thei pawh hi Pathian malsâwmna kan dawng hel bawk a ni.

Tin, MMC inkaihhruaina dân bu hi Kum 2010 February thla khan kan lo nei ṭan a, chu mi hnuah vawi sarih zet mai kan siam tha (revised) leh a, a hun a zirin kan ti danglam hret hret zêl a ni. Kan lo kal tawhna zawng zawngah dân ang thlap thlap chuan ro kan rêl ve thin a, mahse mahni rama cheng kan nih loh avangin a chang chuan Meeting kal hmun thuma ṭhena hmun hnih vote-in a thu kan ṭhiah changte pawh a awm ve bawk thin a ni. 

Member ṭhenkhat chuan inthlan dân chungchangah an lungawi loh avângin dân bu hmanga rawngbâwltute vuak let chângte pawh a awm zeuh zeuh ṭhîn hi a pawi ka ti hle a. Tin, MMC inkaihhruaina dân bu a chhûnga thu ziak mahni Face book wall a an han tarlang piap piak thin pawh hia pawi ka lo ti hle ṭhîn bawk a ni. Fellowship chhûngah rorêlna avânga kan lungawi lo a nih pawhin hruaitute hnenah hrilhin ṭha takin kan ngaihtuah ho tûr a ni a, kan thiam lohna a awm pawhin huai takin thupha kan chawi mai tûrah ka ngai.

MMC Inkaihhruaina dân bu Chapter 12 Article 41:1 (a) leh (b) kan en chuan inthlan dân chi (2) kan nei a, 

(a) General Meeting-in EC member a thlang anga, tichuan GM-in a thlan tlin EC chuan Office Bearer a thlang ang.

(b) General Meeting-in Office Bearer a thlang anga, tichuan GM-in a thlan tlin OB chuan EC a thlang ang.

tiin he inthlan dân chi (2) inthlak thlengin kum 2011 hruaitu turte kan thlan dâwnin Kum 2010 kum tawp aṭang khan tun thleng kan lo hmang ṭhin a ni.

Kum thar hruaitu turte chu kum hluia thlan fel ṭhin a ni a, chuvangin nakum 2021 MMC hruaitu turte pawh kumin 2020 December Pathian ni vawi 2 naah khan kan thlang a, Kan dân bu (b) na angin inthlanna buatsaih a ni. Kumin chu Covid-19 hrilêng avangin General Meeting hmanga inthlanna kan neih theih lova Mipui aiah MMC EC, Nuho EC leh Thalai EC zawng zawngte chu Combined meeting neih a ni. Inthlan niah hian Rawngbâwltu Pastorin min hruai ṭhîn a, mahse Pastor kan neih loh avângin MMC Tirhkoh-in inthlanna min kaihruai a ni. Tirhkohin Chiarman nihna aṭang vote a pe kha pawm rem thei ngang lo member zîngah an awm a MMC dân bu Chapter (8) Article 30B:11 "Chairman-in vote pangngai a nei lo ang a, rorêl thutlûkna chungchângah vote inzat/intluk ang chi-ah ṭha a tih lamah thutlûkna a siam thei." tih ziak hmang a sawisêlna a tawh chungchângah khan pawi ka ti hle bawk a ni.

MMC kan lo kal tawh dânah han thlir let leh ila, Kum 2019 hruaitu tûrte kha MMC Inkaihhruaina dân bu Chapter 12 Article 41:1 (a) GM-EC-OB hmangin December 09, 2018 nikhan inthlanna buatsaih a ni a, inthlan zawhah GM-in a thlantlin EC-te chuan OB tûte thlan nghal a ni a, Rev. Henry Lalhmuaklianan rorêl min kaihruai.Chairman dinhmun aṭang OB thlantlin mi 7 te kha an vaiin vote a pe vek a ni. Secretary Nomination-ah khan Pu Lalnunpuia leh Pu Lalenkawla-te kha vote inzat an hmuh avângin Chairman nihna aṭangin Rev. Henry Lalhmuaklian chu thutlukna siamtîr a ni a, Secretary thlantlin chungchângah Vote 2 a nei a, chu chu kan zavaiin rem kan ti tlang a ni.

Chutiang bawkin Kum 2020 hruaitu tûrte kha MMC Inkaihhruaina dân bu Chapter 12 Article 41:1 (b) GM-OB-EC hmangin December 8, 2019 khan intlanna buatsaih a ni a, Pastor kan neih loh avangin Chairman Pu Rinawman inthlan min kaihruai a, Vote a pe tho a ni.

Kumin MMC OB inthlan laia Chairman-in vote a pe tia lungawi lo chuan kan lo kal tawh dân a hriat loh vâng niin ka hria. MMC EC Meeting rorêl leh MMC hruaitu inthlan earwh a in ang lo tih hi kan hriat a ngai hle niin ka hria. Tin, December 20, 2020 Pathian ni chhûn khân MMCY hruaitu inthlanna buatsaih a ni a, thu hrechiang lova rawngbawltu Tirhkoh kan hnial vak ṭhin pawh hi sim a ṭha khawp mai. Kum 2021 kan chuangkai tawh dâwn a, kum tharah chuan Krista rilru putu kan nih zêl theih nân Lalpan min awmpui ṭheuh hlawm rawh se.

"He rilru, Krista Isua pawha awm bawk kha, nangmahniah awm rawh se."(PHILIPPI 2:4)