"Tun hma thilte chu hre reng suh ula, hmasang thilte chu ngaihtuah hek suh u." (Isaia 43:18)
Keini Zofate hi thil kal tawh tam tak hi kan sawi leh chawk thin a, mahse Tirhkoh Paula chuan kan thlen chin atang a hma sawn turin min lo fuih daih tawh a ni. (Philippi 3:16)
Khawvelah hian tu mah mi famkim kan awm lova, kan hun hman tawh kan nun hlui han thlir let ila mi tam tak chu sum leh pai lama hming chhiat te, Zu ruih hmang te, Uire hmang te, Ruk ruk hmang te, Dawt sawi hmang te, mi sawi chhiat hmang te pawh kan awm nuk awm e!
Chutiang bawkin rinnaa kan pa tia kan sawi thin Abrahama ngei pawh kha a famkim bik lova, a nupui ngei kha ka farnu tiin dawt a sawi a, Sari ngei pawh khan thu tiam fa kha nghak zo lovin a bawinu Hagari lakah nau neih a tum tlat bawk. Tin, Mosia pawh khan tual a that a; Rahabi pawh kha nawhchizuara ni a, Lal Davida ngei pawh khan Uria Nupui a uire bawk a nih kha. An mahni zawnah chuan tlin loh na tam tak an nei a; nimahsela, Hebrai 11 ah chuan Abrahama khan a kalna tur pawh hre lovin rinnain a chhuah thu te, Seri atang vana arsi anga tam leh tuifinriat kama tiau vaivut chhiar sen loh anga tam an lo chhuah thu te leh Mosia ngei pawh kha tual that mahse rei lo te atan sual nawmna thlimpui ai chuan Pathian mite hnena tihduhdah tuar a thlan zawk thute kan hmu thei a ni.
Mi pakhat a piangthar a, pulpitah Pathian thu a sawi laiin tun hmaa a nunhlui mitthla a lang a, a thusawi zawng zawng pawh ngaihnep vek a awm thei. Ringtute hi kan Bible min zirtir angin thil tha ti zel tura ngaihtuah tur kan nih avangin tun hma thil kal tawh hre reng lovin tun hi hun lawmawm leh tun hi chhandamna ni tih hi kan pawm thiam a pawimawh tak zet a ni.
A thu tlem kan tih rik tak te Lalpan a let tam takin malsawm rawh se.
