MALAYSIA MIZO COMMUNITY INKAIHHRUAINA DAN
Chapter I
A.
A hming leh A Nihna
Article (1)
1:1 He inpawlkhawm hming atan Malaysia Mizo Community (MMC) tih a ni ang.
1:2 Malaysia-a awm Mizo/Zofate thliar bik awm lova intanpui tawn tura insuihkhawm pawl a ni.
B.A thil tumte (Objectives)
Article (2)
2:1 Pathian ropui nana Chanchin Tha hril.
2:2 Krista thuhretu ni tura mite buatsaih.
2:3 Hmasawnna kawnga member-te hamthatna ngaihtuah.
2:4 Chhungkua, kohhran, community, ram leh hnam tana mi tangkai ni tura mite buatsaih.
2:5 Member-te zirna lama hmasawn zel tura hma lak.
C.Member nih dan
Article (3)
3:1 Mi tupawh MMC dan zui a, a thiltumte pawma inpawlhonaa tel a duh chuan member a ni thei.
3:2 Mi tupawh kum 18 a chin, membership fee pe apiang full-member a pawm a ni ang.
3:3 Membership fee pek dan leh pek zat tur chu a hun lai EC-in tha a tih angin a rel ang.
3:4 Membership fee hian kum khat (January-December)chhung chauh a huam a ni.
3:5 Member tupawh, hnam dang (Chin hnahthlak ni lo), sakhua danga mi nupui/pasala nei apiang UNHCR nena inkungkaih thilah Community-in mawhphurhna a laksak lo vang.
3:6 Mi tupawh MMC tana pawikhawihtu emaw, MMC dan leh zilhhauna pawm duh lo emaw chu Committee-in tul a tih chuan member nihna a hlihsak thei.
Chapter II
A.Inkaihhruai dan tlangpui Chart
Article (4)
4:1 MMC
General Meeting
Executive Meeting
MMF Ed.C(MRLC) MMCW LC NSS MMCY Mission Board
B.General Meeting (GM)
Article (5)
5:1 MMC member zawng zawng huam rorelna a ni a, MMC ah thuneihna sang ber chelhtu a ni.
5:2 Kum 18 achin member chuan vote a thlak thei.
5:3 A tul dan azirin kum khat vawi khat aia tam buatsaih theih a ni.
5:4 Meeting neih hma a tlem bera kar khat puan lawk tur a ni a, member kal zawng nen a buatsaih theih a ni.
5:5 Majority vote (vote tam ber)chu englaipawhin thutlukna a ni fo ang.
C.Executive Committee (EC)
Article (6)
6:1 GM-in a thlantlin OB mi 7 (or) GM-a Committee member thlantlinte leh department hrang hrang atanga Chairman leh Secretary bakah Advisor-te an ni ang.
6:2 EC member-te leh department tinte thu put luh ngaihtuahtu ber a ni a, GM hnuaia thuneitu sang ber a ni.
6:3 Meeting chu thla tin chawlhni vawi khatnaah buatsaih tur a ni a, member kal khawm then thuma thenkhat tal an tlin loh chuan ro rel theih a ni lo.
6:4 A tul dan a zirin emergency meeting koh theih reng a ni.
6:5 Rorel thutlukna chu majority vote a ni a, rorel sa rel nawn tur chuan vote 2/3 a ni tur a ni.
6:6 UNHCR leh Refugee chungchang zawng zawng hma a la ang.
D.Malaysia Mizo Fellowship (MMF)
Article (7)
7:1 EC hnuaia thlarau rawngbawlna lama hmalatu a ni. Chuvangin, MMF tia koh tur a ni ang.
7:2 Member turte chu rawngbawltute (Full-time pastor/Tirhkoh) leh OB mi 7 te an ni a, an duh danin member an lak belh thei.
7:3 A thil ruahmante (Agenda)chu EC meeting-ah a thehlut ang a, EC hriatpuiin a bawhzui tur a ni.
7:4 Hun kar tlaa loh theih lohva tih tur pawimawh, hmanhmawh ngai chi a awm chuan Community Full-time Pastor, Chairman leh Secretary hriatpuiin a bawhzui ang.
7:5 MMF hruaitu lu chu Chairman tia koh a ni ang.
E.Education Committee (Ed.C)
Article (8)
8:1 EC hnuaia zirna leh thiamna lama hmalatu a ni.
8:2 Member turte chu EC-in a thlan mawhphurhna neitute bakah OB atanga Palaite an ni ang.
8:3 Thil engkim EC hriatpui/kaltlangin a ruahmanin a bawhzui tur a ni.
8:4 Ed.C hruaitu lu chu Director tia koh a ni ang.
F.Malaysia Mizo Community Women (MMCW)
Article (9)
9:1 EC hnuaia hmeichhe lam hmasawnna kawnga hmalatu a ni.
9:2 A hmingah MMCW tih a ni ang.
9:3 MMCW member chu MMC ah Full-member nihna neisa a ni tur a ni. Full-member nihna nei lo chu kaihhruai member a ni ang a, hamthatna a hmu thei lovang.
9:4 EC-in a thlan mawhphurhna neitute bakah OB atnaga palaite an ni ang.
9:5 Mahnia indin (form) thei an nih chuan Community Chairman (or) Pastor kaihhruainain kum tin inthlanna a buatsaih tur a ni.
9:6 MMCW hruaitu lu chu President tia koh a ni ang.
G.Literature Committee (LC)
Article (10)
10:1 EC hnuaia Literature leh Publication lama hmalatu a ni.
10:2 Kar tin Chinchinbu a chhuah ang a, chanchinbu hmingah ‘Zawlbuk’ tih a ni ang.
10:3 EC-in a thlan mawhphurhna neitute bakah OB atanga palaite an ni ang.
10:4 LC hruaitu lu chu Director tia koh a ni ang.
H.Naupang Sunday School (NSS)
Article (11)
11:1 EC hnuaia naupangte thlarau lam hmasawn theih nana hmalatu a ni.
11:2 EC-in mawhphurhna a pekte bakah OB atanga palaite an ni ang.
11:3 NSS hruaitu lu chu Superintendent tia koh a ni ang.
I.Malaysia Mizo Community Youth (MMCY)
Article (12)
12:1 EC hnuaia thalaite Pathian thuah leh hmasawnna kawnga hmalatu a ni.
12:2 A hmingah MMCY tih a ni ang.
12:3 MMCY member chu MMC ah Full-member nihna neitu a ni tur a ni. Full-member nihna nei lo chu kaihhruai member a ni anga, hamthatna a hmu thei lovang.
12:4 EC-in mawhphurhna a pekte bakah OB atanga palaite an ni.
12:5 Mahnia indin (form)thei an nih chuan Chairman (or) Pastor kaihhruainain kum tin inthlanna a buatsaih tur a ni.
12:6 MMCY hruaitu lu chu President tia koh a ni ang.
J.Mission Board
Article (13)
13:1 EC hnuaia thlarau bo zawnna lama hmalatu a ni.
13:2 Board member turte chu a hun laia EC in a thlang ang.
13:3 Mission Board hruaitu lu chu Director tia koh a ni ang.
Chapter III
Committee hrang hrang leh an mawhphurhnate
A.General Meeting (GM)
Article (14)
14:1 General Meeting (GM)hi a tlem berah kum khat vawi khat neih tur a ni.
14:2 Full-time Pastor a awm chuan Full-time Pastor-in a kaihruai ang a, a awm loh chuan existing Chairman-in a kaihruai ang.
14:3 Department hrang hrangten kum khat chhunga an hnathawh/rawngbawlna report leh thlirletna a nei ang.
14:4 Treasurer (1) leh Treasurer (2)-ten kum khat chhunga sum lut leh sum chhuak report fel tak an pe tur a ni.
14:5 Kum thar atan Community hruaitute inthlanna a buatsaih tur a ni.
B.Executive Committee (EC)
Article (15)
15:1 Thla tin chawlhni vawi khatnaah meeting a thu tur a ni.
15:2 Department hrang hrang atangin hnathawhna (Activity)report a lakhawmin a thlirlet ang.
15:3 Department hrang hrang atanga thu lut a ngaihtuahin a bawhzui ang.
15:4 Department hrang hrangte enkawlna leh hmasawnna kawngah mawhphurhna a la ang.
15:5 Committee member-te zingah siamrem ngai a awm chuan a tul dan a zirin a siamrem tur a ni.
15:6 Biak in, Quarters, Office leh Community thil tul dang dangah mawhphurhna a la ang.
15:7 Community member-te chhiatni/thatni (damloh, man, thih, inneih)chungchangah MMC dan zuiin a tul angin ro a rel ang.
15:8 Kum khat atan Community Budget Estimation fel tak siamin Annual GM-ah a theh lut ang.
15:9 ACR-a kal tur Delegate EC zinga mi kum tin a thlang tur a ni.
15:10 MMCW leh MMCY-a palai tur te chu a hunlaia EC in a thlang ang.
C.Malaysia Mizo Fellowship (MMF)
Article (16)
16:1 Sunday inkhawm program a duang ang.
16:2 Chhiatni/thatni ah sakhuana lam mawhphurhna a la ang.
16:3 Bial fan, Crusade buatsaih leh rawngbawlna kawng hrang hrangah a tul angin hma a la ang.
16:4 Community/Fellowship dangte nena rawngbawlho chungchangah EC (or) OB hriatpuiin a tul angin hma a la ang.
D.Education Committee (Ed.C)
Article (17)
17:1 EC hnuaia zirthiamna (Education)lam hmasawnna kawng a dap ang.
17:2 EC meeting-ah kum khatah vawi thum (April, August leh December) report (activities, finance, work plan, etc)a pe lut ang.
17:3 Ed.C hnuaia awm Mizo Refugee Learning Centre (MRLC)-a thawktute (or) zirtirtute lak chungchangah EC-in mawhphurhna a la ang a, an lawmman tur pawh EC-in a rel ang.
17:4 Community pawn lam nen Correspondence (indawr dan) chungchangah a rang thei ang berin EC a hriattir anga, hma a la ang.
17:5 MRLC project tichangtlungin hma a la ang.
17:6 EC hnuaia Ed.C kawl bungraw list fel tak a siam ang a, a vawng tha ang.
E.Malaysia Mizo Community Women (MMCW)
Article (18)
18:1 MMC hmeichhiate hmasawnna kawng a zawngin a bawhzui ang.
18:2 Community pawn lam kohhran, fellowship, organization, etc.nen indawr (correspondence) chungchangah EC hriatpuiin hma a la ang.
18:3 MMCW bungraw neihte list fel tak neiin a vawng tha tur a ni.
F.Literature Committee (LC)
Article (19)
19:1 Zawlbuk chanchinbu a tlangtlak theih ber dan kawng a dap ang.
19:2 Community Office Stationeries, Computers, Literature leh Publication nena inkungkaih thil-ah EC hriatpuiin mawhphurhna a la ang.
G.Naupang Sunday School (NSS)
Article (20)
20:1 Naupangte Pathian thu leh hla lama hma an sawn theih nan hma a la ang.
20:2 Naupang Sunday School hminga Community pawn lam rawngbawlna (outreach ministry/activities) leh special activities/program neih an duh chuan EC remtihna an la hmasa tur a ni.
H.Tlangkawmna
Article (21)
21:1 Department hrang hrang atanga Chairman/Director/President/Superintendent leh Secretary chu Ec-ah member sa (Ex-officio) an ni.
21:2 EC meeting inkoh hman loh khawpa Emergency thil-ah a tul dan azirin OB meeting koh reng theih a ni. Thutlukna erawh chu meeting kal khawm zawngte majority vote a ni ang.
21:3 Meeting ah Secretary pahnihte an kal loh chuan Acting Secretary thlan theih a ni (chumi hun a tan chauh).
Chapter IV
Meeting nungchang
Article (22)
22:1 Committee member-te hunbi tiam khelhin meeting-na hmun an thleng ngei tur a ni.
22:2 Meeting hunbi tiam aia tlai chuan Chairman hnenah luh phalna a dil ngei tur a ni.
22:3 Committee member-te zingah meeting kal thei lo tur an awm chuan phone-in emaw, lehkhain emaw phatna thu fel tak Chairman (or) Secretary hnenah an hriattir tur a ni.
22:4 Meeting hun chhungah zuk, hmuan, hmawmsawm khawih phal a ni lo.
22:5 Meeting rorel laiin miin tulna avanga pawn chhuah lawk a duh chuan Chairman hnenah a hriattir hmasa phawt tur a ni.
22:6 Meeting kal tawh phawt chu rokhawlhna a awm hran loh chuan rorel tawp thleng thu tura phut a ni.
22:7 Committee member tupawh a chhan leh vang hriattirna awm lova vawi thum a zawna meeting a kal lo chu a hunlaia OB in a kal loh chhan a zawtfiah tur a ni.
22:8 Meeting sawm chungchangah SMS emaw, fawn in emaw a sawm thin tur a ni.
Chapter V
Term
Article (23)
23:1 EC atangin Department hrang hrang member thlan tlinte hi kum khat term zel an ni.
23:2 Full-time Pastor term chu kum 2 a ni anga, chumi hnu chu EC kaltlangin GM-in a ngaihtuah ang.
23:3 Tirhkoh term chu kum 1 a ni ang. A bak lak zawm chungchang chu EC kaltlangin GM-in a ngaihtuah ang.
23:4 Clerk leh Coordinator term chu kum 1 tan zel a ni ang.
23:5 MRLC zirtirtute term chu kum khat zel a ni anga, a hunlaia EC in tha a tih chuan a chhawr chhunzawm thei ang.
Article (24)
24:1 Full-member tupawh membership fee a pek kim chhung chiah member-a pawm a ni ang.
24:2 Membership fee pe duh lo chuan MMC member a nih loh avangin Chhiatni/thatni ah Community-in a chungchang a ngaihtuahsak lo vang.
24:3 Member tupawh mahni nungchang that loh (criminal act)avanga Community pawn lam mite, a ram mite leh sorkar nen thubuai an neih chuan Community-in mawhphurhna a laksak lovang.
24:4 He dan bu Chapter I, Article 3(3:6) anga Committee-in ro a rel hnan chuan MMC member nihna atangin Automatic-in a bang ang.
24:5 Membership fee pe lo chu Committee member a ni thei lova, Committee member tawh phawt chuan member dang zawng aia hmain membership fee a pe ngei ngei tur a ni.
24:6 EC member atana thlan tur mi chu mi piangthar, Pathian tih mi, mipat-hmeichhiatna lama hmingchhiatna nei lo leh ruihtheihthil laka fihlim mi a ni tur a ni.
24:7 Zirtirtu tiam loh, Full-time thawktuten part-time hna an thawk tur a ni lo.
Chapter VI
Sum enkawl dan leh hmanchhuah dan
Article (25)
25:1 Sum lut/sum chhuak tiin Account bu pahnih a awm ang.
25:2 Sum lut/sum chhuak te chu a huang a zirin Ledger siam thin tur a ni.
25:3 Sum lut/sum chhuak te chu Receipt nena enkawl tur a ni ang.
25:4 Sum te chu Community thlan tlin Treasurer pahnihte’n an enkawl tur a ni.
25:5 Treasurer pakhatnain Sawma pakhat, inkhawm thilpek, rinna thlaichi leh tanpuina sum te a kawl ang a; Assistant Treasurer (or) Treasurer pahnihnain membership fee, chhiatni/thatni fee leh khawtlang sum a kawl ang.
25:6 Thla khat vawi khat sum Audit tur a ni a, Audit result (or) Report chu EC meeting-ah a pe tur a ni. A tul chuan EC hriatpuiin mipui pungkhawmho hnenah hriattir tur a ni ang. Audit niin TA/DA pek an ni ang a, a zat chu a hunlaia EC-in a bithliahsak ang.
25:7 Treasurer-ten thla tin EC meeting-ah sum lut/chhuak report an pe tur a ni.
Article (26)
Sum hmanchhuan dan
26:1 Member-te zingah MMF dana innei, damdawi ina zankhat mu, nau nei an awmin lawmpuina/tanpuina atan RM 100/- pek an ni ang.
26:2 Member-te zingah thihna tawk palh an awmin MMC-in thlanmual man leh Bus hawh nan RM 7000/- (sang sarih)thleng a tumsak thei ang. Sum hman ban a awm chuan lusun chhungte kuta hlan a ni ang.
26:3 Member-te zingah buaina (damloh/man) tawh avanga Emergency-a sum puk duh an awm chuan RM 500/- (cheng zanga chiah) aia tam lo a hnuaia dan anga hian puk theih a ni.
(a)Hun tiam chhunga a pek theih loh chuan hriatpuituin a peksak ang.
(b)Thlahnih chhungin a rul leh ngei ngei ang tih a intiamkamna lehkhaah hriatpuitu nen hming an sign ang a, chu lehkha chu Treasurer-in a kawl ang a, a copy erawh chu MMC office-ah a pe tur a ni.
26:4 Rokhawlhna avang emaw, emergency avang emaw miin Community thil tulah mahni sum lo hmangin Community-ah a Bill duh chuan Voucher nen chauh a bill thei ang.
26:5 EC emaw, OB emawin a nemngheha hriatpui ni si lovah chuan mi tumahin Voucher tel lovin Treasurer hnen ata pawisa an la chhuak tur a ni lo.
26:6 OB meeting-in EC hriatpui lohvin RM 2000 (sang hnih) aia tam a hmang thei lo.
26:7 OB-ten rik rum thilah EC hriatpui lohvin RM 500 (zanga) aia tam lo a hmang thei ang.
Chapter VII
Office Dan
Article (27)
27:1 MMC Office tih a ni anga, Community huap Head Office a ni ang.
27:2 EC-in mawhphurhna a pek ten Office file felt akin an vawng ang.
27:3 MMC property te, EC secretary-in emaw, EC-in a ruat mawhphurhna neitu emawin list fel tak siamin an enkawl ang a, mawhphurhna neitu hriatpui lohvin hawh/hman phal a ni lo.
27:4 MMC bungbel (property)hawh/hman, tihbo/tichhiat chawitir chungchang leh thil tul dangte chu EC-in tha a tih angin a rel ang.
27:5 MMC neih thil (property)zawng zawng a tlem berah thla rukah vawi khat tal Audit thin tur a ni ang.
27:6 Office room chhungah zuk/hmuam khawih phal a ni lo.
27:7 Office hours chu 10:00 am- 07:00 pm a ni ang.
27:8 Mimal hlawkna leh sumdawnna atan Office bungrua hman phal a ni lo.
Chapter VIII
Community Puipate
Article (28) Chairman dan
Article (28A) A nihna leh tlinna
28A:1 Pathian tih mi, tisa thila mi invawng fel tak a ni tur a ni.
28A:2 A tlem berah kum khat tal EC member lo ni tawh a ni tur a ni.
28A:3 Kum 30 a chin chung lam a ni tur a ni.
28A:4 Community-a mi inhmang leh Community hmangaih thei mi a ni tur a ni.
Article (28B) A mawhphurhnate
28B:1 Community pumpui aiawhtu Head a ni.
28B:2 Community dan bu, GM leh EC kawhhmuhna ang zelin a mawhphurhna a hlen ang.
28B:3 MMC thiltumte leh ruahmannate chu tihhlawhtling tura hmalatu a ni ang.
28B:4 Secretary nen inpuibawmin meeting Agenda a lakhawm ang a, EC meeting a hruai ang.
28B:5 Department hrang hrangte vilven, thawhhona leh tihhmasawnna kawngah mawhphurhna sang ber neitu a ni.
28B:6 Department hrang hrangah member sa a ni.
28B:7 Meeting rorel minutes tihlawhtling turin a bawhzui ang.
28B:8 Community pumpui Budget Estimation chungah mawhphurhna sang tak a ni.
28B:9 Sum lut/sum chhuak hriatpuiin sum humhalh hnaah mawhphurhna pumhlum neitu a ni.
28B:10 Meeting hmuna rorel lain meeting khawih pawi thei inhnialna atthlak/buaithlak a awmin Chairmani thuneihnain meeting a titawp thei.
28B:11 Chairman-in vote pangngai a nei lovanga, rorel thutlukna chungchangah vote inzat/intluk ang chi ah tha a tih lamah thutlukna a siam thei.
28B:12 Full-time system-a kal a nih chuan heng tarlan bakah a tul dan a zirin EC-in mawhphurhna a pek belh thei.
28B:13 Hmalakna kawngah EC puipate hnen atangin thurawn a la thin tur a ni.
Article (29) Vice Chairman
Article (29A) A nihna leh tlinna
29A:1 Pathian tih mi, tisa thila mi invawng fel tak a ni tur a ni.
29A:2 A tlem berah kum khat tal EC member lo ni tawh a ni tur a ni.
29A:3 Kum 30 a chin chung lam a ni tur a ni.
29A:4 Community-a mi inhmang fo thin leh Community hmangaih thei mi a ni tur a ni.
Article (29B) A mawhphurhnate
29B:1 Chairman a awm loh emaw, remchan loh hunah Chairman aiawhtu a ni.
29B:2 Chairman chungchang rorel tur a awm chuan rorel meeting a hruai ang.
29B:3 Chairman awm loh emaw, remchan loh hunah emaw, Chairman-in a mawhphurhna a hlan chhawn emaw chuan Article 28B-naa tarlan Chairman mawhphurhna number te (1)-(13) thleng mawhphurhna a la ang.
29B:4 Vice Chairman chu Chairman thlawptu leh thachhangdawltu a ni ang.
29B:5 Harsatna emaw, remchan lohna avanga Chairman anihna atanga a chawlhin Vice Chairman chu Chairman-ah a lawn nghal ang.
Article (30) Secretary
Article (30A) A nihna leh tlinna
30A:1 Pathian tih mi, tisa thila mi invawng fel tak a ni tur a ni.
30A:2 Mizo, English, Kawl tawng ziak leh chhiar a thiam tur a ni.
30A:3 A tlem berah kum khat tal EC member lo ni tawh a ni tur a ni.
30A:4 Community-a mi inhmang thin leh Community hmangaih thei mi a ni tur a ni.
Article (30B) A mawhphurhnate
30B:1 General meeting (GM), Executive Meeting (EC) leh Office Bearer’s meeting (OB)-ah Secretary hna chelhtu a ni.
30B:2 Chairman kut hnuaia hnathawktu kawppui tha ber a ni. Chairman emaw, EC emaw, OB, Community dan bu emawte kawhhmuhna ang zelin a mawhphurhna a hlen tur a ni.
30B:3 Rorel minutes fel taka ziakin a vawng tha anga, Office-ah a vawng tha bawk ang.
30B:4 Meeting kohna te a hun takah a thawn chhuakin a hriattir thin tur a ni.
30B:5 Community lehkhabu te, thlalakte leh Community nena inkungkaih chi te a enkawl ang.
30B:6 Community thiltumte chhawm kal mekte tipuitlingtu a ni.
30B:7 Community huang (department hrang hrangte a huam tel)lehkha lut/chhuak a vawng tha ang.
30B:8 EC rorel minutes bakah department hrang hrang minutes copy-te a kawl tha ang.
30B:9 Office hna a hriatpuiin a theih ang angin hma a lakpui ang.
30B:10 Englai pawhin Chairman puibawmtu a ni.
30B:11 Chairman nen inpuibawm/inberawnin meeting Agenda a lakhawm ang.
30B:12 Rorelna in thu a tihtluk tawh tipuitling turin mawhphurhna a la ang.
Article (31) Assistant Secretary
Article (31A) A nihna leh tlinna
31A:1 Secretary puitu tha ber a ni a, Secretary a remchan loh emaw, awm loh emaw hunah Secretary aiawhtu a ni.
31A:2 Tlinna chungchang chu Article 30A-naa Secretary nihna leh tlinna, number te (1)-(4)thleng tarlan ang a ni.
Article (31B) A mawhphurhnate
31B:1 Secretary chungchang rorel tur a awm chuan Secretary aiawhin rorel meeting minutes a ziak ang.
31B:2 EC-in Journal Secretary a raut hran lo anih chuan Journalist a ni nghal ang a, Community huang rawngbawlna leh activities te a record-in a vawng tha tur a ni.
31B:3 Secretary awm loh emaw, remchan loh hunah emaw, Secretary-in a mawhphurhna a hlan chhawn emaw chuan Article 30B-naa Secretary mawhphurhnate number te (1)-(12)na thleng ziah lan angin mawhphurhna a la ang.
Article (32) Treasurer-te
Article (32A) Nihna leh tlinna
32A:1 Pathian tih mi, tisa thila mi invawng fel tak a ni tur a ni.
32A:2 Sum leh pail amah mi rinawm, ruih theih thil nena inhnamhnawih lo mi a ni tur a ni.
32A:3 Chhiarkawp a thiam tha tawk ang a, Sumpai enkawl dan Accountancy kalhmang tlem tal a hre tur a ni.
32A:4 A tlem berah kum khat tal EC member lo ni tawh a ni tur a ni.
32A:5 Community-a mi inhmang thei leh Community hmangaih mi a ni tur a ni.
Article (32B) Mawhphurhnate (Treasurer I)
32B:1 Community huanga sum lut leh chhuak fel taka Record-in a vawng tha ang.
32B:2 Community leh Community huanga rawngbawlna hrang hranga sum vawngtu a ni.
32B:3 EC thla thar meeting apiangin sum dinhmun a report thin tur a ni.
32B:4 Sawma pakhat, inkhawm thilpek, tanpuina sum leh rinna thlaichi sum chi hrang hrangte a kawl anga, Sub-committee hrang hrang atanga sum lut a vawng tha bawk ang.
32B:5 Chairman, EC leh Community dan bu kawhhmuhna hnuaiah sumpai a vawng thain a hmang chhuak tur a ni.
32B:6 Committee rorelnain thuneihna a pek hranpa loh chuan ama thuin sum hman phalsak a ni lova, mi puktir phal a ni bawk hek lo.
32B:7 Sum leh pai chungchangah Chairman thlawptu leh thachhangdawltu a ni.
32B:8 Community sumte chu sum thianghlim a nih hre rengin him taka enkawl tur leh thianghlim taka hmang turin mawhphurhna a nei.
Article (32C) Mawhphurhnate (Treasurer II)
32C:1 Membership fee, chhiatni/thatni fee leh khawtlang sum kawltu a ni.
32C:2 Member fee, chhiatni/thatni fee petute list leh sum dinhmun EC thla thar meeting apiangin report a pe thin tur a ni.
32C:3 Chairman, EC leh Community dan bu kawhhmuhna hnuaiah sum a vawng thain a hmang chhuak tur a ni.
32C:4 Committee rorelnain thuneihna a pek hran loh emaw, Community dan piah lamah ama thuin sum hman phalsak a ni lova, mi puktir phal a ni lo.
32C:5 Sum leh pai chungchangah Chairman thlawptu leh thachhangdawltu a ni.
32C:6 Community sumte chu sum thianghlim a nih hre rengin him taka enkawl tur leh thianghlim taka hmang turin mawhphurhna a nei.
Chapter IX
MMF Puipute
Article (33) Pastor
Article (33A) A nihna leh tlinna
33A:1 Community-ah thlarau lam hmasawnna kawngah hmalatu ber a ni a, full-time rawngbawltu a ni.
33A:2 Mi piangthar tha, Pathian tih mi a ni tur a ni.
33A:3 Rawngbawlna kawngah a tul hun apiangah Crusade, Camping buatsaih thei mi a ni tur a ni.
33A:4 English leh Kawl tawng a thiam tha tawk tur a ni.
33A:5 Mizo tawng bakah Hakha, Falam, Teddim, etc. tawngte hi thiam se duhthusam a ni.
33A:6 Bible School pa khat khat atangin a hniam berah B.Th. (kum 4 course) Degree la mi a ni tur a ni a, B.Th.a lakna Certificate (copy) EC-ah a pe lut tur a ni.
33A:7 Protestant Kohhran zingah serh leh sang intawiawm thei (mainline church) kohhran pakhat khatah pastor hna thawk tawh, kum 5 aia tlem lo service nei tawh Ordained a ni tur a ni.
33A:8 Kum 30-65 inkar mi a ni tur a ni.
Article (33B) A mawhphurhnate
33B:1 Thahnemngai taka Chanchin Tha hrilin Community thlarau lam chawm hna a thawk ang.
33B:2 Serh leh sang (Holy communion, Marriage, Baptism, Funeral, Memorial, Thanksgiving, etc.) a buatsaih thin ang.
33B:3 Community sawma pakhat leh thilpek dang a pun theih nan hma a lain a fuih thin ang.
33B:4 Member-te in tin tlawhkualin tawngtai a sem thin ang.
33B:5 Community branch (Entirna : Tumbuk) a tlem berah thla khat vawi khat tlawhin inkhawmna a neihpui ang.
33B:6 Fellowship dangte nena rawngbawlhona kawngah hma a lain a ruahman thin ang.
33B:7 A remchan dan a zirin Biak in/Quarters zan tin tawngtai inkhawmah tel tura beisei a ni.
33B:8 Sunday inkhawm thulh ngai chi a nih hran loh chuan a tul dan a zirin OB/EC hriatpuinain Community pawn lama rawngbawlna zau zawk neih phalsak a ni.
33B:9 Thla rukah vawi khat EC meeting-ah rawngbawlna report a pe thin ang.
33B:10 Tarlan bak chu a tul dan a zirin EC-in mawhphurhna a pek belh thei.
33B:11 Pastor chu EC leh department hrang hrang meeting-ah uap lumtu a ni.
33B:12 MMC pastor chu a duh chuan Refugee try phalsak a ni.
Article (34) Tirhkoh
Article (34A) A nihna leh tlinna
34A:1 Pastor thlawptu leh thachhangdawltu a ni.
34A:2 Pastor hnuaia full-time rawngbawltu a ni.
34A:3 Mi piangthar tha, Pathian tih mi leh Chanchin tha hril kawnga thahnem ngai thei mi a ni tur a ni.
34A:4 Mizo tawng bakah tlangi tawng Hakha, Falam, Teddim, etc. te hi thiam se duhthusam a ni.
34A:5 Protestant kohhran zinga serh leh sang intawiawm thei kohhrante (mainline churches) huam thei thurin (rual pawl thei) keng mi a ni tur a ni.
Article (34B) A mawhphurhnate
34B:1 Pastor remchan loh emaw, awm loh hun apiangah Automatic-in pastor aiawhtu a ni ang.
34B:2 Serh leh sang thil ni lovah chuan pastor a awm loh apiangin Community dan bu Article 33B-naa pastor mawhphurhnate, number te (3)-(10) thlenga tarlan khi pastor aiawhin mawhphurhna a la ang.
34B:3 Tarlan bak chu EC-in tul a tih angin mawhphurhna a pek belh thei.
34B:4 Tirhkoh chu EC leh department meeting-ah uap lumtu a ni.
Article (34C) Remark
34C:1 Pastor leh Tirhkoh hlawh chu EC-in a ruahman ang.
34C:2 Pastor leh Tirhkoh hlawh chu member-te sawma pakhat atangin pek tur a ni.
34C:3 Hlawh bakah tanpuina emaw, lawmman emaw a ngaihtuahsak thei ang.
34C:4 Member-te kanna senso emaw, bial fanna senso emaw chu Community-in a tum ang.
Chapter X
Clerk
Article (35A) A nihna leh tlinna
35A:1 Pathian tih mi, tisa thila mi invawng fel tak a ni tur a ni.
35A:2 Computer thiam, Mizo, English, Kawl tawng ziak thiam tha tawk, kum 25 chin a upa a ni tur a ni.
35A:3 Mizo tawng bakah Hakha, Falam, Teddim, etc. thiam se a duhawm leh zual ang.
Article (35B) A mawhphurhnate
35B:1 Office-a lehkha chhut tur pawimawh apiang a chhu ang.
35B:2 Lehkha lut/chhuakte hotute hnenah a hlan chhawng anga, fel takin file-ah a vawng ang.
35B:3 Hotute remruat anga thawkin thawh zawh tawh lehkhate chu a file tha ang.
35B:4 Lehkha thawn chhuah tur hotute kawhhmuh angin Draft a ziak ang a, hotuten hming an sign hnu ah a tul angin a bawhzui nghal ang.
35B:5 Lehkha chhut zawhah paper hnuai veil amah a hming tawi a ziak ang.
35B:6 Lehkha pawimawh thuruk chu tuma chhiar loh turin fimkhur takin a chhu tur a ni.
35B:7 Office lehkha bak chu mi mal lehkha, Community, sorkar leh UNHCR khap thil a chhutsak tur a ni lo. Hotute phalna lovin khawl, computer bungrua te Office ata a la chhuak tur a ni lo.
35B:8 Community Office-a Full-time-a thawktu anih angin 10:00 am – 07:00 pm hi Office hours a ni anga, 12:00 pm- 01:00 pm hi lunch hour ah a hmang tur a ni.
35B:9 Thawhlehni hi Off-day atana pek a ni.
35B:10 Office, Quarters leh biak in bungrua te vawnghimin a ti thianghlim ang.
35B:11 Puipun/inkhawm hun apiangin Accomodation (thutthleng, etc) rem leh seng hna a thawk ang.
35B:12 Khawi lovah kal ngai, lehkha pe, etc. a awm apiangin a kal ang.
35B:13 EC member a ni tur a ni lo. A tul dan a zirin Observer atan sawm theih a ni.
35B:14 Biak in a member/mikhual rawn lut/chhuakten Office pawimawh an neih a, an rawn tur OB-te an awm lovin a lo dawngsawng ang a, a thlenna turah felt akin a hlan chhawng le hang.
35B:15 Hotuten thawh tur an pek apiang a thawk ang a, Committee-in tul a tih angin mawhphurhna a pek belh thei.
35B:16 Zantin tawngtai inkhawm a tel thin tur a ni.
Article (35C) Remark
35C:1 Clerk hlawh chu EC-in a ruahman ang.
35C:2 Hlawh bakah tanpuina emaw lawmman emaw a ngaihtuahsak thei ang.
35C:3 Clerk chu kum khat tan zel a ni.
35C:4 Biak in nena inkungkaih thila senso chu MMC-in a tum ang.
35C:5 Clerk chu Darwan hnachelhtu a ni nghal ang.
Article (36) Coordinator
Article (36A) A nihna leh tlinna
36A:1 Pathian tih mi, tisa lam thila mi invawng fel tak a ni tur a ni.
36A:2 Ruihtheihthil khawih lo mi a ni tur a ni.
36A:3 English leh Kawl tawng thiam a ni anga, Malayu tawng thiam a nih chuan a duhawm leh zual ang.
36A:4 Mizo tawng bakah tlangmi tawng dang thiam ni se duhthusam a ni.
36A:5 UNHCR card nei ni se a duhawma, Community card vuan mi tha tak emaw a nih chuan ngaihtuahsak tho a ni ang.
36A:6 Community hmangaih leh mi inhmang a ni tur a ni.
36A:7 Sawrkar thu buai (criminal act) nei lo mi a ni tur a ni.
36A:8 EC-ah Ex-officio member a ni a, a tul dan a zirin OB meetingah sawm theih a ni.
Article (36B) A mawhphurhnate
36B:1 Community Coordinator a nih angin UNHCR, NGO, ACR, Community hrang hrang, tual chhung leh ram chhung thuneitu (local authority) te nena indawrna leh thawhhonaah a tul dan a zirin Chairman nena thawk tlang tur a ni.
36B:2 Community member-te dam lo damdawiin, clinic-a kalpui hi a mawhphurhna a ni a, an dam lohna a zirin UN card-an hmuh theih nan hma a lakpui tur a ni.
36B:3 CDU (Community Development Unit) thla tin meeting a kal anga, meeting report fel fai takin MMC office a thlen thin tur a ni.
36B:4 Member-ten UNHCR/ACR-ah mamawh an neihin hma a lakpui ang.
36B:5 Lungin tan kan tul an awmin a ruahman pui ang.
36B:6 Man tawk an awmin a bawhzui nghal vat thin tur a ni.
36B:7 Pawn chhuah tulna a awm loh chuan 10:00 am- 07:00 pm thleng Office a kai thin a tur a ni.
36B:8 Darkar 24 chhung englai pawha koh theihin a awm reng tur a ni.
36B:9 Zirtawp hi Off-day atana pek a ni.
Chapter XI
MRLC zirtirtute
Article (37) In Charge (Principal)
Article (37A) A nihna leh tlinna
37A:1 English thiam tha a ni tur a ni.
37A:2 Graduate (degree nei) a ni tur a ni.
37A:3 Lecture bakah a tul dan a zira MRLC nena inkungkaih activity danga thawk leh buaipui tura in pe thei a ni tur a ni.
37A:4 Hun vawng dik mi a ni tur a ni a, mahni invawng fel mi a ni tur a ni.
37A:5 A tlem berah kum khat tal MRLC tana inpe theitu a ni tur a ni.
37A:6 Mizo tawng ziak leh chhiar thiam a ni tur a ni.
37A:7 Zuk leh humam fihlim mi a ni tur a ni.
Article (37B) A mawhphurhnate
37B:1 MRLC hma a sawn zel theih nan leh vawngnung zel turin Education Committee leh EC te hriatpuiiin hma a la thin tur a ni.
37B:2 Pawimawh vanga leave a mamawh chuan MMC Admin.(Chairman/Secretary, etc) te a hriattir tur a ni.
37B:3 Zirtirtute meeting thla khat vawi khat a neihpui thin tur a ni.
37B:4 Activities report thla thum vawi khat EC meeting-ah a pe thin tur a ni. EC-in a phut anih chuan a aia tam/tlem pawhin a pe thin tur a ni.
37B:5 MRLC nena inkungkaih Information zawng zawng a chelh tur a ni.
Artitcle (37C) Remark
37C:1 MMC ah membership fee, chhiatni/thatni fee leh Pathian ram a thun tur a ni.
Article (38) Zirtirtute (Teachers)
Article (38A) Nihna leh tlinna
38A:1 English thiam a ni tur a ni.
38A:2 Naupangte hmangaih thei leh Volunteer (tlawmngaihna) rilru nei mi a ni tur a ni.
38A:3 A tlem berah kum khat tal MRLC tana inpe theitu a ni tur a ni.
Article (38B) Mawhphurhnate
38B:1 Pawimawh vanga leave a mamawh chuan In Charge (Principal) a hriattir tur a ni.
38B:2 Lecture bakah a tul dan a zira MRLC nena inkungkaih activity dangte thawk leh buaipui tura inpe theitu a ni tur a ni.
38B:3 Hun vawng dik mi a ni tur a ni a, mahni invawng fel mi a ni tur a ni.
38B:4 Mizo tawng ziak leh chhiar thiam mi a ni tur a ni.
38B:5 Zirtirtu chu thuamhnaw (silhfen) mawihnai takin a inbel thin tur a ni.
Artitcle (38C) Remark
38C:1 MMC ah membership fee, chhiatni/thatni fee leh Pathian ram an thun tur a ni.
Chapter XII
Inthlan dan leh vote pek dan
Article (39)
39:1 Inthlan dan chi (2) a awm a, duh zawk pakhat khat hman theih a ni.
(a)General meeting (GM)-in EC member turte a thlang ang a, tichuan GM-ina a thlan tlin EC chuan Office Bearer (OB) te a thlang ang.
(b)General meeting (GM)-in Office Bearer (OB) te a thlang fel ang a, tichuan GM-ina a thlan tlin OB-ten EC member turte a thlang ang.
39:2 Kum hlui EC meeting-ah kum tawp GM hun a ruahman ang a, kum thar EC member-te thlan tur zat bithliah bawk ang. A tul chuan Nomination Board pawh EC-in a ruahman thei ang.
39:3 Hruaitute inthlannaah Clear majority vote hman tur a ni a, secret ballot vote ngei hman tur a ni.
39:4 Chairman thlan tlin dan chungchang bikah chuan vote zatve (1/2) aia tam a ni tur a ni.
39:5 Mimal chungchang rorel ngai a awm chuan secret ballot vote ngei hman a ni anga, rorel pangngaiah chuan ban phar vote hman mai tur a ni ang.
39:6 Rorel tawh tih danglam leh siamthat ngai a awm chuan meeting kal zat atanga vote 2/3 hman ngei tur a ni ang.
39:7 Emergency thil a nih loh chuan meeting hi kar khat advance-a in hriattir tur a ni.
Chapter XIII
Dan nemngheh, tihdanglam, thiah leh belhchhah
Article (40)
40:1 He MMC dan hi EC meeting-in a endik hnuah GM (mipui kalkhawm)-in vote 2/3 remtihnain nemngheh tur a ni. Nemngheh a nih veleh dan dinglai a ni nghal (nemngheh hun tar lan tur) ang.
40:2 A tul dan a zirin he dan hi kum khat vawi khat ennawn, tihdanglam, belhchhah, thiah theih a ni.
40:3 Dan dinglai tihdanglam tur chuan EC member vote
2/3 a tul a ni.
