Ka hunte nangin i vawng a

KHB 552

Ka Hunte Nangin I Vawng a

Ka hunte Nangin i vawng a,

Ka hun zawng i ruat a ni;

Nangmahin hun bite i siam,

Khawvel nil eh kumte chu.

He kum thar hi,

Aw Pathian, malsawm ang che.

Ka hunte Nangin i vawng a,

Zing, chhun, tlai leh zante pawh;

Hun petu chu Nangmah i ni,

Chi tinreng tuh leh seng hun.

I rawnbawl nan,

Kum tluanin min hmantir rawh.

Ka hunte Nangin i vawng a,

Hun lawmawm leh harsate;

Lungngaih tel lo lawm nite leh,

Hun tawp hluhawm min hmuaktu.

Ka hun zawng hi,

Rawngbawl nan min hmantir rawh.

Hunte an inherlian zel a

KHB 554

Hunte an inherliam zel a

Phuahtu: Rokunga

Hunte an inher liam zel a,
Lei pangpar mawite an chuai e;
Chutin kan hlim lai nite pawh,
Hma takin an ral leh thin.

Aw hun, aw hun, Chatuan khua varna chu,
Chatuan, chatuan, aw hun danglam tawh lohna chu;
Aw ka thlarau, tah chuan khawiahnge i awm ang.

Hunte an inher liam zel a,
Rethei leh hausa mi zawng zawng;
Boralna kawng lamtluang zawhte’n,
Chatuan hremhmun an chang ang.

Chatuan kawngkhar chu an hawng ta,
Ni tin sang tam tak an lut e;
Tupawh Isua ring apiangte’n,
Chatuan lawmna an chang ang.

Hunte an inher liam zel a,
Aw, ka thlarau inpeih thuai la;
Chu chatuan ral thei lovah chuan,
I tan hmun a la awm e

KUM THAR CHANG VAWN

SAM 90:1-17

PATHIAN MI MOSIA TAWNGTAINA

Lalpa, nang chu chhuan zawng zawng chenah

Kan awmna I ni thin.

Tlangte pian hmaa,

Leilung leh khawvel I din hma pawh khan,

Chatuan ata chatuan thleng pawhin

Nang chu Pathian I ni.

Nang chuan mihring hi boralnaah I kartir thin a;

“Mihring fate u, kir leh rawh u,” I ti thin.

Nanga ngaih chuan kum sangkhat hi

Nimin ral ta ang lek kha a ni si a,

Zan ven khat chhung ang lek bawk a ni.

Anni chu lui lian angin I len bo thin a;

Thang khat mu ang chauh an ni;

Zingah chuan hlobet chawr chhuak ang an ni.

Zingah chuan a lo duahin a chawr chhuak a;

Tlai lamah chuan ah thlukin a awma, a vuai thin.

I thinurnaa tihboralin kan awm a,

I thinrimnaa tihmanganin kan awm bawk si a.

Kankhawlohnate chu I hmaah I dah a,

Kan sual zep rukte chu I hmel engah I dah ta a.

Kan dam chhung kumte chu kum sawmsarih a ni a,

Chakna avangin kum sawmriat pawh a ni thei e;

Nimahsela a reina chu thawhrimna leh lungngaihna mai a ni;

A ral thuai a, keini pawh kan thlawk bo thin a nih hi.

Tuin nge I thinurna thiltihtheihzia hriaa,

Nangmah tih turzia anga I thinrimna chu hria le?

Kan dam chhung nite chhiar dan tur min zirtir ang che,

Finna thinlung kan neih phah hialna turin.

Aw LALPA, lo kir leh ang che; eng chen nge I thinur dawn?

I chhiahhlawhte chung thu-ah chuan I rilru lamlet ang che.

Aw, zingah chuan I ngilneihnain min titlai ang che;

Kan dam chhung zawng zawng hian kan hlima kan lawm theihna turin.

Nangin min tihhrehawm ni leh,

Thil tha lo kan tawh kum chhung hun angte khan min tilawm ang che.

I hnathawh chu I chhiahhlawhte hnenah lang sela,

I ropuina chu an fate hnenah lang rawh se.

Tin, LALPA  kan Pathian mawina chu kan chungah awm rawh se;

Kan kut hnathawh hi kan chungah tinghet bawk ang che;

A ni, kan kut hnathawh hi tinghet ang che.

FAPA PEKIN KAN AWM TA

FAPA PEKIN KAN AWM TA

Isaia 9:6 “ Kan tan naupang a lo piang a, fapa pekin kan awm ta a; rorelna chu a kokiah a chuang ang a; a hmingah chuan Maka, Remruattua, Pathian Chaka, Chatuan Pa, Remna Lal an ti dawn si a."

Thuthlung Hluia zawlnei ropui Isaia chuan B.C 740 vel a tang khan Isua lo pian tur thu hi a lo puang daih tawh a ni.

Khawvel Chhandamtu rawn pian tur thu chu Vantirhkoh Gabriela khan nula thianghlim Mari hnenah a rai tur thu, thlarau thianghlim a mi a nih tur leh a hmingah Isua an sak tur thu a hrilh a ni. Khang hun lai khan mihausa tak tak nula thianghlim tam tak an awm teuh lain daikil kawm a mi nula thianghlim Mari a thlang kha zawlnei Isaian ‘Maka’ a lo tih na chu a ni. Lal Isua a lo pian khan Bethlehem khauah khualbuk tam tak a awma mahse khualbuk an chan tawh loh avangin ran chaw pekna thlengah an zalh ta mai a ni, chu thu vek chu Zawlnei Isaia khan ‘Remruattua’ tia a lo puan lawksa Pathian remruat a ni. Khaw Chhak Mifingte khan a nu Mari hnena naute chu an hmuha, an bawk khup a, chibai an buka, tin an ro bawmte an hawng a, a hnenah chuan lawman rangkachak te, Beraw te, murra te pein Lal anih tur leh kan sual aia a thih tur te en tirna a ni.

Luka 2:10-11 kan en chuan , Vantirhkhoh chuan Berampute hnenah vawiinah hian an tan Davida khuaah Chhandamtu a pian ta, Lal Krista chu, tih kan hmu. Khawvel Chhandamtu rawn piang hi daipawna beram vengtu tlawm takte kha Vantirhkoh chuan hrilhin chibai an va buk hmasa ber tih kan hmu a ni. Nang leh kei hi mi tlawmte pawh ni ma hila Lalpa hian min thlahhlam lova min hre reng a ni. Khaw Chhak mifingte kha Isua Chibai buk tura an kal khan Arsi ena an kal khan kawng an bo lova mahse an ngaihdan a an kal khan Lal Heroda inah an luh avangin nausen tam tak an suat pah a ni. Chuvangin Lalpa ena kan kal chuan kawng kan bo lova a thu lova kan khawsak chiah hian kawng dik lovah kan kal thin a ni.

Khawvel a changkan ang zelin mihring hi kan changkan zela, Krismas hun laia zurui bur bur a khawlaia mu ta mai mai te tlangmi kan vang hle tawh a, tun hma leh tun kan dinhmun hi a in thlau tawh hle a ni. Krismas hun laiah Biakina inkhawm leh Len khawmna hmunah kan thlalaite tam tak ka hmuhin Pathian hnenah lawm thu ka sawi lo thei lo a ni. Chrismas Ni inkhawm dawnin Pathian kan pawl ho nan kan silhfen zinga tha ber ber te nen kan inthuam te hi a ropui tak zet a ni.

Khawvel Chhandamtu Pianni Krimas hi hlu taka hmangin kumin chhunga kan thil tih sual zawng zawngte thupha chawiin, hlim leh lawm takin a biakbuk in panin kan awrawl neih zawng zawng nen kan Lal Isua pianna lawmin I chawimawi ang u.

MISSIONARY CHAWMNA

MISSION CHAWMNA
Malaysia Mizo Fellowship hnuaiah Mission Board chu May 13, 2012 a tang a din tan a ni. Missionary chawmna hmun leh chawm zat erawh kum tin a in ang lova kum 2016 a kawlrama Missionary kan chawm zat erawh chu mi 4 chiah an ni.
Mission Board in Missionary Pakhat theuh a chawmna hmun te chu:
1. The Truth Mission Evengelical Fellowship (TMEF)
2. Myanmar Evengelical Fellowship (MEF)
3. Prebyterian Church of Myanmar (PCM)
4. Evengelical Methodist Church (EMC) te an ni.
Malaysia Mizo Fellowship ah hian thla tin Chawlhni kar 2 na zelah Mission Pual thilpek khawn a ni a, Mission chawmna ah hian Malaysia Mizo Community Youth (MMCY) leh Malaysia Mizo Community Women (MMCW) te chu thla tin mission chawm naah sum faiin an tel ziah a ni. Kumin 2016 January to December kan missionary Chawmna zawng zawng chu Ks. 5,220,000 Cheng nuai Sawmnga Pahnih leh Singhnih chiah ani e. Heti zozai sum leh pai thawh thei tura min tanpuitu kan Pathian chungah lawmthu ka sawi duh bawk a ni.
Missionary chawmna pawisa kan thawnin Pu Kawilam Rochhunga (Bless Rain) hian rawngbawlnaa ngaiin tlawmte tea min thawn sak thin avangin a chungah pawh kan lawm tak zet a ni.

Mission Board in a tlangpuia rawngbawlna report member te hriat ve ngei turin ka rawn tar chhuak a ni e. Ka lawm e.

MALAYSIA MIZO FELLOWSHIP PASTOR

Rev. Khamh Tin Uk-a hi Wesleyan Kohhran rawngbawltu Pastor a ni a, Malaysia Mizo Fellowship Pastor a tan May 16, 2010 khan Malaysia a rawn thleng a, October 31, 2016 thleng tlawmngai taka rawng a bawl hnuin November 1, 2016 khan Myanmar lamah min haw san ta a ni. Malaysia Mizo Fellowship ah kum 6, thla 5 leh ni 15 chiah rei tak thahnemngai takin rawng a bawl a ni. Myanmar-a rawng a bawl zel naah LALPA kaihhruaina a chan zel theih nan duhsakna ka hlan e.

KUM 2017 MALAYSIA MIZO COMMUNITY/FELLOWSHIP HRUAITUTE

             Vawiin December 11, 2016 Pathianni Inkhawm hian General Meeting chuan kum 2017 MMC Hruaituturte inthlanna buatsaih a ni. Kum 18 a chin chunglam Vote pe thei zawng hi member 70 kan awma, Vote chhiartute Pu Lalnunpuia (Con), Pu Eldest Malsawmsanga, Pu Lalnunzira, Pu Bawilianzam leh Pu Rohluchharlianate an ni.
             December 2016 thlathar EC rorel angin kan inthlan dan chu MMC Inkaihhruaina Dan "Chapter XII Article 39 (b)General Meeting (GM) in Office Bearer (OB) te a thlang fel anga, tichuan GM-in a thlan tlin OB-ten EC member turte a thlang ang" tih kan hmanga kum 2017 Office Bearer (OB) turte thlanna (Election) kan nei a ni. Bialtu Pastor awm loh avangin "MMC Dan Bu Chapter III Article 14:2 na Full-time Pastor a awm chuan Full-time Pastor in a kaihruai ang a, a awm loh chuan existing Chairman-in a kaihruai ang," tih angin kum 2016 MMC Chairman Pu Thlamuanpuian inthlanna min kaihruai a ni. Kum 2015 leh 2016 hian Chairman Full-time a thawk (Hlawh neia chhawr) an ni a, kum 2017 erawh chuan Chairman Full-time in a thawk tawh lovang tih chu EC rorel thu chhuak a ni.

KUM 2017 MALAYSIA MIZO COMMUNITY/ FELLOWSHIP OFFICE BEARER 7 TE

          Chairman  : Pu Rinawma
Vice   Chariman  : Pu Thlamuanpuia
          Secretary  : Tv. Israela
Asst.  Secretary  : Pu Lalnunpuia
      Treasurer I    : Pu Lalnunzira
       Treasurer II  : Pu Bawilianzama
Auditor Convinor: Pu Rohluchharlian