ṬAWNGṬAI HLAWHTLINNA THURUK

ṬAWNGṬAI HLAWHTLINNA THURUK

Rev D Lawmsanga

1. Thuhma

Ringtuten Pathian kan biaknaa kan ngaih pawimawh leh chakna hnar nia

kan inzirtir ṭhin ṭawngṭaina hi bang lova kan tihmak mawh tur a ni a. Amaherawhchu

ṭawngṭai hlawhtlinna bul hre fiah si lo hian kum rei tak kan lo ṭai tawh a ni mai thei.

Thlaraumite ziak leh sawi kan hre tam tawh bawkin a rinawm e. Vawiin a ringtute

hian kan ngaih pawimawh tur chu kan ṭawngṭaina Lalpan min chhang ṭhin em? tih hi

a ni.

Mi ṭhenkhatte hi chuan kan ṭawngṭaina kan ngaihsak leh tawh lo a ang

viau. Kan dilna ang ni lova thil a lo thlenin Lalpan kan ṭhatna turin min thawhsak

zawk a ni kan ti sam et a, a hahdam thlak hle a. Mahse ṭawngṭaina chhang a nih chuan

a diltuin a chhia lam emaw a ṭha lam emaw a hre fiah ngei ngei tur a ni. Entirnan :

Paulan Lalpa hnenah damna dilin vawi thum a ṭawngṭaia a dilna angin tihdam ni lo

mahse a chhanna a hre fiah tlat a ni( II Kor 12:8,9). Chutiangin, ringtuten kan

ṭawngṭai chhanna hi kan hrefiah ve tur a ni a, hre ngei turin kan ṭawngṭai a pawimawh

bawk.

2. Engvang innge Lalpan kan Ṭawngṭaina a chhan ṭhin loh?

Mi tute pawh hian Pathian biain kan ṭawngṭai ṭheuh va, chawp leh chilh a

chhanna kan hmuh sawi tur kan ngah hle laiin a chhanna kan hmuh loh hi a tam zawk

a ni mai lawng maw? “Mi au la, kan chhang ang che” ( Jer 33:3) titu Lalpan eng vang

innge min chhan ṭhin loh? Ṭhenkhat chuan kan ṭawngṭai dan position a dik tawk loh

vangah ngaiin ṭhingṭhit dan te, bawkkhupa ṭai dan te, ban phara ṭai dan te an inzirtir

ṭhin. Lalpa chu zahtlak Pathian a ni a, uluk takin kan be tur reng pawh a ni. Mahse

kan hriat tur chu ṭawngṭai hlawhtlinna bul erawh chu tih dan ( style, position) ah a ni

lo va, a ṭawngṭaitu nun lam Lalpan a en zawk \hin a ni. Lalpa ṭihna nei si lova

ṭhingṭhia nilenga ṭawngṭai aiin amah ṭih chunga rei lote ṭawngṭai hian awmzia a nei

zawk daih ang.

Mahni hamṭhatna tura hmanhlel tlawm leh zah pawh dawn lo ṭanghmasial

ran ringtu ṭawngṭaina te, sual haw lo mual pho chauh hlau mi chapo ringtu ṭawngṭaina

te, Pathian din kohhran chhunga buaina siam ṭhin tu te, kohhran tana thil ṭha lo tih hre

reng sia mahni ṭhian ṭha emaw unau emaw nih vanga ṭanpui tum ṭalh Pathian aia

mihring en ṭhin ringtu ṭawngṭaina te, mite malsawm dawn thika dik lo taka phiar ru

\hin awhna dik lo pai tlat ringtu ṭawngṭaina te, chhungkua, khawtlang, kohhrana dawt

sawia inrem lohna thlaichi tuh ṭhin lei daw thei ringtu ṭawngṭaina te Lalpan a chhang

ngai lo.

“Lalpa chu kan harsatna ata min chhanchhuak thei lo turin a ban chu

tihtawiin a awm lova, kan auhna aw hre thei lo tur khawpin a beng a ngawng hek lo,

engvang nge min chhan loh tih chuan kan sualna te chu Pathian leh kan inkara tlain

min ti ṭhen zawk a ni” ( Isaia 59:1-4). Chuvangin, vawi tam ṭai ṭhin mah i la, sual hi

kan huat loh chuan kan hlawh chham fo vang.

3. Eng Tiang Ṭawngṭaina Nge Lalpan A Chhan ṭhin

Mathiaa 6:33 “A ram leh a felna chu zawng hmasa zawk rawh u,

tichuan, chung zawng zawng chu a pek belh chhah dawn che u nia” tih kan hmu

a, Lalpa nun neitu chu a ram leh a felna neitu kan ni ngei a, mahse nun neitu

chungah Lal Isuan Lalna a chan a ṭul tlat. Ringtuten kan tih loh tur kan tih loh

ngamnaah Lalpa ṭihna a awm a, kan nunah Lalpan Lalna a chang ṭhin. A ram

leh a felna neih tih chu ram neitu Lal Isua nun thuawihna nun neih hi a ni.

Chutiangin kan mamawh engkim min hriatsaktu Lalpa ṭih chunga ke pen ṭhin fa

tak thuawih ringtu ṭawngṭaina chu a hlawhtling ṭhin a ni.

Lalpan ringtu te, ti tura min duh zinga pawimawh em em mai, kan

tih ngei ngei tur chu mahni chaw mi rilṭamte hnena phal taka sem, rethei leh mi

mangangte chhawmdawl, mi saruak hmuha silh leh fen tur pek, mahni tisa

angpu laka biruk loh, fahrah leh hmeithaite an hreawm laia kân leh ṭanpui \hin

hi a ni (Isaia 58:7-8; Jakoba 1:26). Heng hi Lalpa duh zawng leh lawm zawng a

ni. “ Chumi hunah chuan i ko vang a, tichuan, Lalpan a chhang ang che, i au

ang a, tichuan a nin, “ Heta hi ka awm” a ti ang ( Isaia 58:9).

4. Tlangkawmna

Kan ṭawngṭaina Lalpan min chhang se tih kan duh vek a, mahse

Lalpa duh dana nun erawh kan peih lo. Malsawmtu aiin a malsawmna kan

buaipui a, malsawmna dawn thleng nei si lovin malsawmna tam tak dawn kan

tum leh ṭhin, ṭawngṭai hlawhtlingte tih dan kan zira, an nun dan erawh

kan zir peih leh si lo. Kan buaina chinfel tir tur atan chauh Lalpa hi kan duh

ṭhin a ni mai lawng maw! Krista nun neitute mahni sualzia inhmu reng siin kan

sual chhunzawm zel dawn em ni? Nitina kan chin ṭhin thil ṭha lo kan sualte

sima Lalpan ti tura min duh, thil ṭha tih a, ti lo tura min duh kan tih loh ngam

bawka thuawihna nun aṭanga ṭawng\aina hi ṭawngṭai hlawhtlinna thuruk chu a

ni e. Lalpan malsawm rawhse!