𝐍𝐆𝐀𝐈𝐇𝐃𝐀𝐌𝐍𝐀

"𝑴𝒊 𝒂𝒏 𝒃𝒂𝒘𝒉𝒄𝒉𝒉𝒊𝒂𝒕𝒕𝒆 𝒊𝒏 𝒏𝒈𝒂𝒊𝒉𝒅𝒂𝒎 𝒄𝒉𝒖𝒂𝒏, 𝒊𝒏 𝑷𝒂 𝒗â𝒏𝒂 𝒎𝒊𝒊𝒏 𝒂 𝒏𝒈𝒂𝒊𝒅𝒂𝒎 𝒗𝒆 𝒂𝒏𝒈 𝒄𝒉𝒆 𝒖. 𝑵𝒊𝒎𝒂𝒉𝒔𝒆𝒍𝒂 𝒎𝒊𝒕𝒆 𝒊𝒏 𝒏𝒈𝒂𝒊𝒉𝒅𝒂𝒎 𝒔𝒊 𝒍𝒐𝒉 𝒄𝒉𝒖𝒂𝒏, 𝒊𝒏 𝑷𝒂𝒊𝒏 𝒊𝒏 𝒃𝒂𝒘𝒉𝒄𝒉𝒉𝒊𝒂𝒕𝒕𝒆 𝒂 𝒏𝒈𝒂𝒊𝒅𝒂𝒎 𝒃𝒊𝒌 𝒍𝒐 𝒗𝒂𝒏𝒈." (𝗠𝗮𝘁𝘁𝗵𝗮𝗶𝗮 𝟲:𝟭𝟰-𝟭𝟱)
               
               Vawiinah  "𝑵𝒈𝒂𝒊𝒉𝒅𝒂𝒎𝒏𝒂" tih thupui hmanga lehkha ziak tûrin ka rilruah a rawn awm thut mai a, tling lo tak leh insit chungin ka theih tawkin ka rawn thai leh nawk nawk dâwn a ni. Thu ziak ṭhang êm êm ka nih loh avângin sei lutuka ziak hi a chhiartu tân a ninawm palh ang tih pawh ka hlau hle a, chuvângin tawitêa rawn ziak vê hram erawh ka tum a ni.

A chunga ka rawn tarlan tak Bible châng khi Lal Isua ṭawngkam a ni a, kan Lal Isua pawhin ngaihdamna chungchâng hi a ngai pawimawh hle niin ka hria. Lehkha ziaktute leh Pharisaite pawh khan an do nasa a, tihduhdahna chi tinreng a tuar bawk a ni. Tin, kan hriat ṭheuh tawh angin Isua chuan kan sualnate ngaidma tûrin leh chatuana nunna kan lo neih theih nân Kalvari Kross-ah khenbeh a ni kha! Chutichuan, Kross-ah an khengbeh khan a thih dâwnah pawh khan Pathian hnênah a khengbettute tiltih ngaidam tûrin a dîl a ni. (Luka 23:34)

Tûna kan biak mêk kan Pathian hi ngaihdamna ngah tak a ni a, Juda Lal Manasea khan a ti thinrim avângin Lalpa chuan Asuria Sipai a tira Babulon salah a tantîr a ni. Mahse Manasea chuan Babulon sala lungngai taka a awm hnuin a pi leh pute Pathian hmaah nasa takin a intihnuai a. Lalpa hnêna a inchhir taka a ṭawngtai hnuah Lalpa chuan Jerusalem-ah a hruai haw leh tih kan hmu a ni. (II Chronicles 33:9-13) Chutiang bawkin keini ringtute pawh hian vawi engemaw zat Lalpa kan ti thinrim ṭhin a, pain a fate a hmangaiha vua ang hian Lalpa chuan min vaw ṭhin pawhin a rinawm a ni. Tin, kan sual kan sima rilru/thinlung zawng zawnga kan inchhiara a hnên kan pan phawt chuan engtik lai pawha danglam ngai lo Pathian chuan min ngaidam ṭhin a ni.

Khawvêlah hian keini ringtute hi khualzin mai kan ni a, nakina kan hawna hmun tûr chu Pa hnen a ni tih erawh kan hai hlawm lovin ka ring. Lalpa chuan ringtute hi harsatna kan tawh a phala harsatna hi min chhutkian sak dâwn ni lovin harsatna kan tawh hunah ama hnêna kan thlen thiam theih nân a duh a ni.Chutichuan, he kan khual zinna ramah hian mite tihduhdahna te, sawichhiatna te, elrelna te, huatna te, hnuaichhiahna te leh hupphurhna te pawh kan tuar a ni mai thei. Chûng min sawichhetu te zawng zawng chu kan beih let chuan anmahni ang chiah kan ni ang a, kan thinlung chhûngah hian Lalpa hian hmun a chang dâwn lo hi a lo ni reng a ni. Miin dawta sual tinrenga min hek pawhin Lalpa hminga kan ngaihdam erawh ringtute tih mawk mawh lian tak chu a ni. Petera khan Isua hênah ka unauin ka chungah thil tisual sela vawi sarih tleng em ni kan ngaihdam ang tia a zawh khan Isuan a hênah "Vawi sarih tlengin ka ti lo va che, vawi saih hmun sawmsarih tlengin ka ti zâwk che a ni tiin a chhang a ni. (Matthaia 18:21-22)

A tawp berah chuan, Lal Isua chuan mi bawkchhiatna kan ngaihdam chuan kan Pa vâna miin min ngaihdam tûrte leh kan ngaidam lo a nih chuan kan Pa vâna miin min ngaidawm bik dâwn loh thu min hrilh a ni. Tin, Petera hnênah pawh min te'n kan chunga thil an tihsual chuan vawi sarih hmun sawmsarih ngaidam tûrin a hrilh ang bawkin keini ringtute pawhin kan chunga thil tisualtute hi vawi sarih hmun sawmsariha kan ngaihdam theih nân Lalpan kan za atân mal min sâwm sak rawh se! Amen.