Hming Thleng Dan

              North America ramah hian tlangmi tam tak an thleng a, a tam zawk chu raltlan angin an thleng hlawm a. A tlangpuiin India leh Malaysia lam atang rawn thleng hi an tam deuh ber a, mi tam chu raltlana kan awmna hmuna UNHCR-a kan hming lem pek angin kan rawn lut thin a ni. Enga vang nge hming lem kan hman thin tih chuan a bik takin Malaysia-ah chuan lo thleng hmasa te'n mahni hming taka luh chuan mahni awmna ramah kan zin lut thei tawh dawn lo a ni tia in sawi theihna a awm thin vang a ni. Tichuan, Community card kan siam khan hming lemin ka siam ta mai thin a, chu mai ni lovin, a hun laia community hruaitute khan hming tam tak chu UNHCR-ah an thehlut a, UNHCR chuan Mobile Registration a koh chiahin mi tam zawk chuan UN Card an lo hmuh tawh avangin aiawh an luh tir mai thin a ni. Chuvangin, hming mai bakah nu leh pa hming in ang an awm tak nuk thin avangin Department of Homeland Security (DHS) chuan hming in ang a hmuh nual a kum 2014 vel atang khan hremna (punishment) a pe tan a, hming in angte chu Malaysia-a chambang zawk kha USA lut lo turin a hnawl emaw kum sawm a hreng tang thin a ni. He thuah chuan duh tawk rih phawt ila!

            Canada ramah hian hming hi a thlak theih a, kum erawh chu a thlak theih loh a ni tih hi a hmasa bera kan hriat tur pawimawh tak mai a ni. Mi tam tak chuan rammi nihna (Citizenship) kan nei tawh a, hming a thlak theih tawh lo tiin an sawi thin a; nimahsela, engtik lai pawhin hming hi a thlak theih a ni. Mahni hming dik takin kan thlak lo anih chuan kan thih huna kan thlan lungah kan hming lem kha a chuang kiau mai dawn a ni tih hi kan hriat reng a pawimawh hle. Tin, Kohhran leh khawtlangah pawh hian memberte hming dik tak hre reng siin an thleng hma loh chu an hming lema ka ko talh talh thin hi Krista Rilru kan pu hlawm em tih keimahah hian zawhna lian tak mai a awm fo thin a ni. 

          Hming kan thlak dawn chuan kum 12 a chin chunglam zawng hi a hmasa berah Royal Canada Mounted Police (RCMP) ah kut nem a ngai a; tin, mahni awmna hmun atanga hnai ber Police Station-ah thil sual kan ti lo tih finfiahna lehkha lak bawk tur a ni. Chumi hnuah chuan Legal Name change form ziaka Registry hmun pakhat khata thehluh tur a ni a, kan form thun rualin Inneihna Certificate bakah fate birth certificate copy thehluh nghal tur a ni. Tin, a process chhung hi thla ruk a awh thin a, thla ruk hnuah chuan kan awmna province sorkarin kan chenna hmunah hming thlengna certificate min rawn thawn ang a, kan dawn fel huah chuan kan hming thlengna certificate kengin kan ID, health card, SIN numbers, bank cards etc. te chu awlsam takin kan thlak mai dawn a ni. In kan nei tawh a nih pawhin ka hming dik tak nenin Land Title-ah kan thlak nghal mai thei bawk a ni.

Chhiartu zawng zawngte in chungah ka lawm e.

2024 Property Tax

 Canada ram chhungah hian in or hmunram (property) ka neih chuan Chhiah (Tax) thla tin chawi a ngai a, heng kan tax pek atang 65% hi City of Calgary in a nei a, 35% hi Alberta sorkarin ah an chhung thin a ni.

Tin, City of Calgary hian kum tina kan tax chhun tur zat hi kum tin May 24 niah lehkhain a thawn chhuak thin a, chutianga an tuk zat chu June 28 thleng pe tlak thei turin hun an tiam thin. He property tax hi June 28 hnua kan pe rih lo a nih chuan min tuk zat atang 7% a pung an pektir dawn a ni. Tichuan, May thla tawp pawha pek zat tur lehkha kan la dawng rih lo a nih chuan 311 or (403-268-2489 Calgary khaw pawn) atang biak mai tur a ni.

Thla tina instalment-a pe duh chuan calgary.ca/propertytax website atang kan roll nambar 9 chhuin register tur a ni. Hetianga instalment pek dan hi Tax Instalment Payment Plan (TIPP) ti pawhin an ko thin a ni. He website atang kan TIPP tura kan register a nih chuan July thla atang December thleng pek tur zat kan bank account set up atang an rawn la mai dawn a ni. Kan hriat tur chu Credit Card Payment an rem ti lova, Void Cheque hmanga register thin tur a ni.

Aw le, a chunga ka rawn tarlan hi Calgary khawchhunga awm tan a ni a,  a pek dan tur pawh kan hriatthiam ka beisei. Ka lawm e.

Ro min relsak ang che

   RO MIN REL SAK ANG CHE
   By Rokunga

1. Aw Nang, kan Lal, kan Pathian,
    I hming ropui ber se;
    I hmaa kan lo kun hian,
    Kan dil ngaithla ang che.
    Kan awmdan tur ngaihtuaha,
    Mipui kan inkhawm in,
    Finna ropui min pe la,
    Ro min relsak ang che.

2. I finna leh theihna leh
    I hruaina lo rengin,
    Ropuina leh lalthuthleng,
    An ral  leh thuai si thin.
    Nang erawh chu chatuanin,
    Hnam tin tan kulhpui  nghet,
    Lalberte Lalber chuanin,
    Ro min relsak ang che.

3. Chuvangin, aw, kan Pathian
    Hei hi kan dil ber che,
    Kan ram kan hnam min hruaia'n,
    Nang chauh kan thlang a che.
    Chhung lam leh pawn lam hmelma,
    Indona thleng mah se;
    Hneh zel turin min pui la,
    Ro min relsak ang che.

ISUA NEIH KA DUH ZAWK TIH HLA LO CHHUAH DAN

 

Copy & Paste

Kum 1930 chho vel khan New York Khawpuia George Beverly-a thawhna Insurance Company chu an sumdawnna a tlak hniam nasat avangin, thawktute hlawh tihhniam tumna thawm a rawn awm tan a.

Tlangval kum 22 mi lek George Beverlypawh a inngaihtuah buai nasa ta hle mai;

A hlawh lak lai pawh chhungkaw han chawmna tham a nih loh laiin, chutia hlawh tihhniam a han nih leh zel chuan a hma lam hun engtinnge ni ta ang? Nupui te neiin, chhungkua a din thei dawn em ni?

Chutia rilru hrehawm leh buai ru taka a awm lai chuan, a aw that zia leh a zai thiam zia chu hriain New York Radio Station chuan Radio Artist ni tura zai chhinturin an rawn sawm ta hlauh mai a.

A han zai chhin chuan thiam an tiin an duhta hle a ni. Radio Artist nghet ni a, nitina a zai tih chhuah turin Contract Sign pui an duh thu an rawn hrilh ta a; George Beverly te chhungkua pawh an hlim hle mai.

A pa hi Pastor niin Pathian rawngbawltu chhungkua an ni a, Biak Inah Pathian fakna hla sain a zai thin kha a ni a, Radio-ah pawh chuan Pathian fakna hla chauh sak a duh thu a han sawi chuan, Radio lam thuneitute chuan Pathian fakna hla chu Sunday-ah chauh an tih chhuah dawn avangin a hla tam zawk chu Hit Parade ami hla (Khawvel lam hla) a sak a ngaih dawn thu an lo hrilh ta a.

A aw a that leh a zai thiam em avang chuan, Khawvel lam hla lengzem leh hla lenglawng te a sak chuan, khawvelah lâr chhuakin mihausa tawn taw a nih theih thuai an rin thu te an lo hrilh a. George- pawh a rilru a buai ta map mai le. Inngaihtuah rih deuh a duh avangin hun pe rih turin a dil ta a.

George-a chu a inngaihtuah buai ta hle mai a, Khawvela a lar dan tur zia te a han ngaihtuah a, tlangval naupang te a la ni a; nula hoin an ngaihsan dan tur te, sum rawn luh ruih ruih dan tur te a han ngaihtuah a, lengzem lam han sak mai duhna te pawh anei ve ta rum rum a ni.

A piano chu a ti ri tan ta zeuh zeuh a, a nu chuan a ngaihtuah ta hle mai a. Pastor chhungkua an ni a, an fapa chuan lengzem lam a larpui hluai mai chuan a tha dawn lo hle hian a hria a; a fapa duh tak chu khawvel sualna tuipui chuan a chimpil bo daih a hlauthawng ta em em a ni.

Tichuan, Inrinni zanah chuan Rhea F.Milleran hla chhammi (Poem) a siam “Isua neih ka duh zawk, Rohlu ber aiin, A ta nih ka duh, lei sum zawng neih aiin” tih chu a Piano a hla ziak dah naah chuan a lo dah a. Sunday inkhawma sak tura a lo ruahman sa zir tura Sunday zinga a Piano hmaa a han thut chuan, chu hla ziak chu a han hmu ta mai a.

A han chhiar chuan, a rilru a khawih ta em em mai a, a hla sak tum sa chu ngaihsak zui tawh loin chu hla chu a thluk a han siam tan a, a Piano chu ahan hmet ri a, a sa nghal ta zel a. “Isua neih ka duh zawk, Rohlu ber aiin, A ta nih ka duh, lei sum zawng neih aiin; Isua neih ka duh zawk, ram leh in aiin, A kut thirkhen mi hruaina ka thlang zawk e”, tih zawhah chuan hla thu dang a lo thleng zel a,“Isua neih ka duh zawk, mi te chawimawina aiin, Rinawma amah tan tlat fo ka duh zawk; Isua neih ka duh zawk Khawvel hmingthanna aiin, A hming thianghlim tak chu chawi ka nuam zawk e,” a lo ti thei ta a ni.

Chu hla chu a thluk a siam zo a, Biak Inah chuan thinlung leh tih tak zetin a sa ta a. A Testimony a ropui bawk a, mite thinlung a khawih ta em em mai a, kar lo ah Khawvel a dengchhuak ta nghal a.

Chicago Radio pawhin Pathian hla chauh a sak phalin Contract an Sign pui ta tho a, Billy Graham te nen an lo inhmelhriat ta zela, Billy Graham-a Crusade naah te a zai thin a, mite thinlung a hneh em em thin a ni. Billy Graham Home Coming Video-ah tepawh kan lo hmuh ve thin hi.

George Beverly Shea hi kum 102 mi niin kum 2013 khan ropuina ramah a lo chawl ta a; a thih hnuah pawh he hla zet hi chuan ropui takin mite thinlungah thu a la sawi zel a ni.

Rev. Vanlalsiama Hrengsa kan chan ta!

                                                (December 8, 1953 - January 23, 2024)

Rev. Vanlalsiama Hrengsa chuan kum 40 chuang Pathian rawng a bawl hnuin January 23, 2024 (Thawhlehni 1:13pm) khan rinawm taka a rawngbawl thin Lalpa hnenah min chawlhsan ta a ni. Ani hi Calgary Chin Emmanuel Churh-a Bialtu Pastor thawk mek a ni. Tin, Rev. Vanlalsiama hian a nupui Pi Darthangliani, a fanute pathum leh a makpa pahnihte a kalsan a ni.

Vawiin January 28, 2024 (Chawlhni 2:00pm - 3:00pm) hian Mountain View Funeral Home & Cemetery 1605 100 St SE, Calgary thlanmualah vui tur a ni.

Rev. Vanlalsiama hi a bula awm a nuam em em mai a, kum 2021 khan Canada kan rawn theng khan min rawn tlawh bakah an nu Pi Liani nen min bazar pui bawk a, kan chungah a tha em em bawk a ni.

A dam lai khan "Leiah in nei lo mah ila vanah Pathian hnena ka haw leh hunah in ka nei a ni" tiin a sawi thin a, a ropui tak zet zet a ni. A boral hma khan an inah kan chhungin an inah kan va leng a, Employment Insurance (EI) ka ei zatte min zawt a, ka hrilh hnuah chuan tuna a Pastor hawh ai a tam thu min hrilh a. kei pawhin tuna a hlawh ai tlem pawh hlawh dawn se, Pastor a la thawk tho ang em tih thu ka zawt a, "Dam chhunga Pathian rawngbawl turin ka inserh hranga engzat pawh min pe se ka lawm vek tur a ni" tiin min chhanga a ropui ka ti tak zet a ni. Tun laiah Pastor hlawh a tlem e mai, Pastor hna ka thawn thei tawh lovang tia Kohhranah banna lehkha thehlut an awm laiin heting a tawngkam ka hria hi ka ngaisang hle bawk a ni.

Rev. Vanlalsiama kan ui tak zet zet che a ni e.

Thlir Letna

 

                         A hnuaiah hian kum kal ta a rawngbawlna tlem thlir letna ka rawn thai lang leh dawn a, chhiartu zawng zawngte chungah ka lawm hle a ni.

Calgary Chin Evangelical Fellowship (CCEF) mass meeting chuan kum 2022-2023 term khat atan Naupang Sunday School Superintendent-ah min ruat a, chu chu rawngbawlnaah ngaiin tling lo takin ka lo thawk ve a. Kum 2023 March thla chanve hnu lam atang khan Province danga hna ka thawh avangin thlakhatah vawi 1 (or) vawi 2 vel chuah kan inkhawm hman thin a, term khat chu kan lo kal nawk nawk bawk a ni.

𝗭𝗶𝗿𝘁𝗶𝗿𝘁𝘂𝘁𝗲 𝘁𝗮𝗻 𝗛𝗿𝗶𝗮𝘁 𝘁𝘂𝗿 𝗽𝗮𝘄𝗶𝗺𝗮𝘄𝗵
Naupang Sunday School zirtirtute hi an pawimawh em em a, kan naupangte hi ka bul hnai bera kan misiion file an ni tih hi kan hriat a ngai. A hming mai (တာဝန်ကျေ) ni lovin hmangaih taka Pathian thu kan hrilh a pawimawh tak zet bawk a ni. Tin, tun kar chawlhni lo kal tura naupang kan zirtir dawn a nih chuan kan naupangte zirtir tur hi in lamah kan lo enlawk sa tur a ni a, naupang ho hmaah zirlaibu en lova zirtir theih hi a pawimawh hle bawk a ni. Tichuan, Syllabus kan nei a nih chuan Syllabus ang thlap a kal theih hi zir a tha hle bawk. 

𝗧𝗮𝘄𝗻𝗴 𝗖𝗵𝘂𝗻𝗴𝗰𝗵𝗮𝗻𝗴

Kan Naupang zirlaibu zawng zawng hi a tlangpuiin Mizoram zirlaibu kan hman thin avangin mizo tawnga ziak a ni tlanpui a. Chu ziak chu sap tawnga leh tur hram loh a tha a, mahni tawng hi humhlah a tul avangin Mizo tawng ngeia zirlai pek thei erawh a tha hle a ni.

Nikum khan Mizo Community of Canada chuan thal sikul a hawnga kan naupangte Mizo tawng an thiam nan tiin mi tlamngai tak tak chuan an hun hlu tak sengin Mizo tawng an zirtir a. Naupang tam tak chuan an hlawkpui hle a ni tih kan hriatin kan lawm hle a ni. Mi tam tak chuan "Canada Rama lo cheng tawh German ho pawhin an fa leh zelte hnenah anmahni tawng pawh thiam tir thei tawh lovin English-in an tawng vek" tih thu hi an sawi lar khawp a; nimahsela, kei chuan kan naupangte hi kan tawng kan zirtir chuan an thiam ngei turah ka ngai a ni. 

Nu leh Pa tam tak chuan Camp-a hna thawka kan awm laiin "Naupang Sunday School-ah kan fate hi Mizo tawng ngeia in zirtir kan duh" tiin min hrilh thin a. Nu leh Pate'n mahni tawng ngei (Mizo tawng) an ngai hlu hi ka lawm hle mai a; tin, Naupang Sunday School Ni kan hmanga kan sermon-tuin Sap tawnga a sermon pawh Nu leh Pate ngaihdan ni lovin ka hnenah an faksel vak mai a ni. Chutiangin Nu leh Pate pawhin mahni tawng ngei Mizo tawng tia kan hriat lar "Duh Lian Tawng" hi kan ngai pawimawh hle a ni. 

𝗞𝗮𝗻 𝘀𝗮𝘄𝗶𝗻𝗮 𝘁𝘂𝗿 𝗰𝗵𝗶𝗮𝗻 𝗮 𝗻𝗴𝗮𝗶

Kan hnathawhna hmunah hian Foreman, General Foreman leh Superintendent kan nei thin a. Hlawh pung tura kan dil duh chuan Superintendent hnenah tlang takin kan dil thin a ni. Chutiang bawkin kan fate Naupang Sunday School a kan dah duh (or) Zirtirtuah kan inpe duh a  nih chuan tlang takin Superintendent hnenah kan sawi a ngai a ni tih thu hi nu leh pate hnenah ka chah leh mawlh mawlh duh bawk a ni.  

A tawp berah chuan Zirtirtute hi Pathian kan tih a pawimawh hle a, kan naupangte zirtir tur hi kan dah pawimawh ber a ngai a ni tih hi thlir letna tlem ka rawn nei ve a ni e, ka lawm e.

Pathian In

 1 Korinth 3:16 "Pathian in in nih leh Pathian Thlarau nangmahniah a awm reng tih in hre lo vem ni? Tu pawhin Pathian in chu a tihkhawloh chuan, chu mi chu Pathianin a tikhawlo vang; Pathian in chu a thianghlim si a, chu in chu nangmahni in ni e.

Vawiinah "Pathian In" tih thupui hmangin tlem ka rawn sawi leh dawn a; kan Bible chuan Pathian in kan nih thu leh chu Pathian in thianghlim tak chu keimahni kan nih thu min hrilh bawk a ni.

Kei pawhin he ka taksa hi Pathian In a lo ni reng a ni tih thu hi ka lo varpawh har lutuk a, kum 2006 thleng khan Kuhva, Khaini leh Sadah etc. hi kan lo ching ve fo thin a; nimahsela, Pathian khawngaihna a zarah kum 2006 hnu atang chuan ka lo bansan thei ve ta hi mak ka ti hle a ni. Vawi eng emaw zat chu bansan tumin ka bei ve thin nain ka lo ban thei lawk lo va; mahse, kan taksa hi Pathian In a nih zia varpawh tan chuan hetianga zuk leh hmuam bansan hi thil har a ni lo hle a ni. 

Zuk leh hmuam hi thiante'n an tih chuan awlsam taka tih ve mai hi a awl em em a; nimahsela, ban san leh tur erawh chuan thil har tak a ni ve bawk a ni. Tin, Sahdahte hi kan hmuam lai chuan kan bula mite tan a rim a chhiat tur zia hi kan ngaihtuah thiam lem lova, kan nghei hnuah erawh chuan a hmuam tute bula awm hi hreawm kan ti leh hle thin a ni. 

Ringtute hi Pathian nung bia kan ni inti siin zuk leh hmuamah kan inthlahdah erawh hi chu a lungchhiat thlak hlein ka hria. Sam ziaktu chuan, "I biak in hung chhung kawtlaia ni khat awm hi, ni sangkhat aiin a tha zawk si a. Suahsualna puan intea awm ai chuan kan Pathian ina kawngkhar vengtu nih pawh a duh zawk a ni." tiin a ziak a. (Sam 84:10) 

Ringtu tam tak chuan Pathian Nia inkhawm kan rawn kal hian, Biak In hungchhung kan thlen phatin Kuhva (or) Sahdah kan han hmuam nghal a. Tin, mi tam tak pawhin inkhawm ban hmain biak in hungchhung ngeiah meizial han zuk (or) Kuhva thial kan ching thin hi ringtute tih atan chuan a mawi lo hle a, ring lo mite'n min han hmu sela Kristian nih an chak lo hle ang le. Chuvangin, ringtute hi thianghlimna kawngah tan kan lak nasat a ngai hle a ni.

A tawp berah chuan, kan taksa hi Pathian In kan nih zia kan hriat chian hi a pawimawh hle a; chuvangin, heng zuk leh hmuam mai mai hi chuan Pathian In hi i ti bawrhbang lo hram ang u tiin thahnem ngaihnain ka rawn thailang ve zawk a ni e. Chhiartu zawng zawngte Lalpan a let tam takin malsawm rawh se! Amen.

Naute Mipa nge Hmeichhia?

      Sam ziaktu chuan "Ngai teh, fanaute hi LALPA laka kan ro chan an ni a, Rila rah hi a lawmman min pek a ni." tiin a sawi a. (Sam 127:3)

Nupa tam takin fanau nei thei lova an awh em em laiin mi tam tak chuan awlsam tea fanau an nei thei hi Pathian hnena lawmthu sawi tur kan ni tih hai rual a ni lovang.

Tin, mi tam tak chuan Mipa (or) Hmeichhia piang tur chu kan thu a ni lo tiin thian leh rualte hnenah kan sawi thin a; nimahsela, fa kan neih hunah Mipa nise tia kan rilruk laiin a hmeichhia a rawn piang leh thin hi kan ngaihdan a ni lo leh tlangpui thin a ni. Chuvangin, a hnuaiah hian Hmeichhe pian hun leh Mipa pian hun hi Family Planing Doctor-te thurawn min pek angin ka rawn ziak dawn a ni.. Tichuan, ka rawn ziah hi mi zawng zawng tan eawh a dik kher lo mai thei a; nimahsela, a tlangpui chuan a dik ve thova ka hriat avangin tlem ka rawn thai lang ve dawn a ni,

A tlangpuiin hmeichhiate hi thla khatah vawi khat thi an nei thin a; tin, thla khatah vawi hnih nau neih theihna chance hi an nei bawk a ni. Chutiang nite chu, thi an neih atang ni sarih leh ni riat ni bakah thi an neih atang ni sawm pali leh sawm panga niah te hian an rai thei bawk a ni tih hriat a tha. Hmeichhia hi an thi nei atang ni sawmhnih hnu atang an thi neih leh thleng hi nau an pai theih loh avangin condom hmang kher lova inpawl pawhin an rai thei lo bawk a ni Tin, naunei thei tur chuan mipa pawhin mawhphurhna an nei bawk a, chu chu an chi hi chang turin a tlem berah kar khat chhung insum rih tur a ni. 

Aw le, kan thupuiah lut tawh ila; hmei chhia an thi neih atang chhiara ni sawm sarih (or) ni riat nia kan inpawl chuan hmeichhia a hrin thei a; tin, ni sawm pali (or) sawm panga nia kan inpawl erawh chuan mipa kan hriang thei a ni tih thu hi mi tam takin hre tawh mah ila a hre lo te tan tlemin ka rawn tuinghih ve duh a ni e.

Hei hi 100% in a dik tih erawh ka sawi lova a tlangpui chuan a dik ve thin a ni tih hi ka rawn tarlang ve duh a ni e, Chhirtu zawng zawngte chungah ka lawm e.

 

 

 

 
 

INTHLAN DAN

 INTHLAN DAN

Kohhran, Khawtlang leh Insuihkhawm Pawl chi hrang hrangte hian Kum tawpah emaw kum tharah emaw hruaitu thar an inthlang thin a. A then chuan term khat hi kum khatah vawi khat tia bithliah an awm laiin a then chuan term khat hi kum hnih tiin an bithliah bawk thin a ni.

Tun lai khawvela inthlan dan tlangpui chu Chairman/President leh Secretary te hi mipuiin an vawt a; tin, vawt hmu tam ber hi tlingah an pawm tawp zel bawk a ni. Hetianga inthlanna hi a dik lo hul hual tiin ka sawi ngam tawp lova; nimahsela, a fel hlel deuh niin ka ngaihtuah thin a ni. Tin, Office Bearer (OB) tur mipuiin kan thlanga vote kan pe a nih chuan (eg. Nominee mi 4 kan lo thlang ) vote sang ber hmutu khan mipui kal khawm vote 50% a chin chunglam a hmu lo a nih chuan a sang ber dawttu nen a hranin vote pe leh thei nise a duhawm leh zual a ni.   

Chuvangin, Kohhran, Khawtlang leh Insuihkhawm pawl hrang hrangte hian kan inthlan hunah a chunga ka rawn tarlan inthlan dan hi zawm thei hram ila a tha hlein ka ring. Chutichuan, Vote petu mipuite tanah pawh kan lungawi tlang hlein a rinawm a ni.