Pathian In

 1 Korinth 3:16 "Pathian in in nih leh Pathian Thlarau nangmahniah a awm reng tih in hre lo vem ni? Tu pawhin Pathian in chu a tihkhawloh chuan, chu mi chu Pathianin a tikhawlo vang; Pathian in chu a thianghlim si a, chu in chu nangmahni in ni e.

Vawiinah "Pathian In" tih thupui hmangin tlem ka rawn sawi leh dawn a; kan Bible chuan Pathian in kan nih thu leh chu Pathian in thianghlim tak chu keimahni kan nih thu min hrilh bawk a ni.

Kei pawhin he ka taksa hi Pathian In a lo ni reng a ni tih thu hi ka lo varpawh har lutuk a, kum 2006 thleng khan Kuhva, Khaini leh Sadah etc. hi kan lo ching ve fo thin a; nimahsela, Pathian khawngaihna a zarah kum 2006 hnu atang chuan ka lo bansan thei ve ta hi mak ka ti hle a ni. Vawi eng emaw zat chu bansan tumin ka bei ve thin nain ka lo ban thei lawk lo va; mahse, kan taksa hi Pathian In a nih zia varpawh tan chuan hetianga zuk leh hmuam bansan hi thil har a ni lo hle a ni. 

Zuk leh hmuam hi thiante'n an tih chuan awlsam taka tih ve mai hi a awl em em a; nimahsela, ban san leh tur erawh chuan thil har tak a ni ve bawk a ni. Tin, Sahdahte hi kan hmuam lai chuan kan bula mite tan a rim a chhiat tur zia hi kan ngaihtuah thiam lem lova, kan nghei hnuah erawh chuan a hmuam tute bula awm hi hreawm kan ti leh hle thin a ni. 

Ringtute hi Pathian nung bia kan ni inti siin zuk leh hmuamah kan inthlahdah erawh hi chu a lungchhiat thlak hlein ka hria. Sam ziaktu chuan, "I biak in hung chhung kawtlaia ni khat awm hi, ni sangkhat aiin a tha zawk si a. Suahsualna puan intea awm ai chuan kan Pathian ina kawngkhar vengtu nih pawh a duh zawk a ni." tiin a ziak a. (Sam 84:10) 

Ringtu tam tak chuan Pathian Nia inkhawm kan rawn kal hian, Biak In hungchhung kan thlen phatin Kuhva (or) Sahdah kan han hmuam nghal a. Tin, mi tam tak pawhin inkhawm ban hmain biak in hungchhung ngeiah meizial han zuk (or) Kuhva thial kan ching thin hi ringtute tih atan chuan a mawi lo hle a, ring lo mite'n min han hmu sela Kristian nih an chak lo hle ang le. Chuvangin, ringtute hi thianghlimna kawngah tan kan lak nasat a ngai hle a ni.

A tawp berah chuan, kan taksa hi Pathian In kan nih zia kan hriat chian hi a pawimawh hle a; chuvangin, heng zuk leh hmuam mai mai hi chuan Pathian In hi i ti bawrhbang lo hram ang u tiin thahnem ngaihnain ka rawn thailang ve zawk a ni e. Chhiartu zawng zawngte Lalpan a let tam takin malsawm rawh se! Amen.