By Lalnunpuia Hualngo
Tûnlaia Covid-19 tia kan hriatlar êm êm Coronavirus chuan khawvêl hmun hrang hrangah fangkualin mihring 4.53 Million chuan he natna hi an vei tawh a ni. Tin, he Virus avâng hian Malaysia-a cheng a rammite bakah keini tlângmite nunphung pawh hi a tibuai hle bawk a ni. Malaysia ram zauh lam hi 329,847 Square Kilometres niin khawchhak lamah State 11 leh Khawthlang lamah 2 Federal territories (tualchhûng ro inrêl sia Sawrkâr pakhat inzawm) tia ṭhen hran a ni. Tin, Malaysia khaw thlang lam hi a va piah deuh avângin tlângmite hi a tlângpuiin khaw chhak lamah kan chêng hlawm a ni. Malaysia-ah hian March 2020 a UNHCR chhinchhiah (record) angin Râltlan (Refugees) leh Humhim ngai (Asylum-seeker) 179,520 an ziak lut tawh (Registered) a nih thu an tarlang a, chûng zînga 154,460 chu Myanmar aṭang rawn kal an nih thû a tarlang bawk a ni. Chung Myanmar aṭang râltlana rawn kal zîngah chuan Rohingyas mi 101,580, Chin mi 22,660 leh Kawlram chhûnga hnam dang mi 31,220 te an ni tiin UNHCR chuan a tarlang a ni.
Malaysia sorkar chuan March 18, 2020 aṭang khan June 9, 2020 thleng Movement Control Order (MCO) a puang a, (MCO tia an koh hi hmun hrang hranga Lockdown tia an koh nen a inthuhmun deuh reng a ni.) company hmun hrang hrang pawh khar a ni. Tin, May 4, 2020 aṭang khan Malaysia Prime Minister Tan Sri Muhyiddin Yassin-a chuan a ram Economy a tlak hniam em avângin MCO dân (law) tlemin a thla zal deuh va, a ramchhûng hmun ṭhenkhat a dawr ṭhenkhat chu fimkhur taka hawng leh tûrin ruahmanna a siam a ni.
Health Ministry of Malaysia Sorkar chuan State bial chhûnga Coronavirus veite hi a chhinchhiah zêl a, tin, mahni bial chhûnga natna vei zat mi 41 aṭang chunglam zawng chu "Red Zone" tiin a puang a ni. Tûna Pudu area chhûngah pawh hian tlângmi 2000 vel cheng ang a ngaih a ni. May 5, 2020 thawhṭan zîng 8AM velah Malaysia thuneitu Health Ministry te, Police te leh DBKL te chuan Personal Protective Equiment (PPE) kawr hain Pudu Bazar leh a chheh vêla zawng zawnga cheng ram dang mi 500 (Chûng mite chu a tlangpuiin Bangladeshi, Indonesian, Chinese leh Vietnamese) vel chu Virus an finfiah sak a, chûng an finfiah zîngah mi 10 chuangin Virus an vei thu an hmu chhuak ani. (Thu lakna: Malay Mail by Radzi Razak on 5 May 2020)
Tin, Health Ministry of Malaysia chhinchhiah dânin Pudu area chhûngah May 4 aṭang virus vei thar hmuh chhuah a ni tih thu an sawi. Chûngte chu:
*May 4, 2020 niah Positive zat mi 17
*May 5, 2020 niah Positive zat mi 18 (New Case 1)
*May 6, 2020 niah Positive zat mi 19 (New Case1)
*May 7, 2020 niah Positive zat mi 26 (New Case 7)
*May 9, 2020 niah Positive zat mi 29 (New Case 3)
*May 11, 2020 niah Positive zat mi 32 (New Case 3)
*May 13, 2020 niah Positive zat mi 40 (New Case 8)
*May 14, 2020 niah Positive zat mi 58 (New Case 18)
Hetianga Pudu area chhûngah a vei tawh zawng zawng mi 58 an tlin takah chuan Malysia sorkar chuan Pudu chu "Red Zone"ah a puan hnuin May 14, 2020 Ninga zân 10PM vêlah Sipai pâwl (Army), Police leh DBKL te chuan Pudu hmun ṭhen khat chu thîr hlîng nei (Barbed Wire) nên hung hrangin a lockdown nghal a ni. Tin, May 15, 2020 zîng aṭang Health Ministry lam chuan an lockdown hmun chu a dawt te tein virus an vei leh vei loh a fianfiah nghal a ni.
Malaysia sorkarin a lockdown Pudu hmuna kan tlângmi leh MMC member zawng zawng tam tak pawh an hlauthawng viauin a rinawm a, mahse Pudu hmun ṭhenkhat chu Red Zone a an puan avângin virus an neih leh neih loh a thlawna finfiah sak an nia, kawng leh lama ngaihtuah chuan Health Ministry lamin a thlawna min finfiah sak hi a lâwmawm viau a ni.
Khawvêl hmun hrang hranga cheng rawngbâwlpui u leh nau zawng zawngte Malaysia Pudu-a cheng kan tlângmi zawng zawngte thlamuang taka an awm ṭheuh theih nân ṭawngtainain min hre reng hlawm dâwn a nia.
"Amah ṭihtutu chu, an vêlah LALPA vântirhkoh chuan a awm chilh a, a chhanhim ṭhîn." (SAM 34:7)
===============================================================
No comments:
Post a Comment