MYANMAR WESLEYAN KOHHRANA RAWNGBAWLTU PASTOR DIL CHUNGCHANG

MYANMAR WESLEYAN KOHHRANA RAWNGBAWLTU PASTOR DIL CHUNGCHANG
                                                       Lalnunpuia Hualngo                                                   

                   
             Lehkha hi ka ziak ngai zên zên lo va, lehkha ziak thiam tak pawh ka nih loh avângin pehhel zawnga ziah pawh ka thiam lo a ni. Chuvângin kan hun tawn tawh zawng zawng chu a ngial a nganin ka rawn ziak phawng phawng mai dâwn a ni, ziah sual palh te a awm a nih chuan chhiartute in mi ngaihdamna ka râwn dîl hmasa a che u! Tin, mihring tumah tih lâwm tum ka ni lo va, Pathian tih lâwm ka tum zâwk a ni tih hi a hmasain ka sawi duh bawk a ni. (Galatia 1:10)

              Malaysia Mizo Community/ Fellowship (MMC/F) a rawngbâwltu Rev. Henry Lalhmuaklianate chhûng chuan Visa an hmuh theih loh avângin 15th September, 2019 khan Myanmar lam min haw san ta a ni. Tin, MMC/F chuan rawngbâwltu Pastor neih leh ngei ṭha a ti a mahse Malaysia sorkar chuan Visa kum khat tân a pêk ṭhin chu Kum 2018 May thla hnua Sorkar tharin a thlak a chin chu hmuh theih a nih tawh lo a ni. MMC/F kum 2019 November thla thar EC Meeting chuan Myanmar Wesleyan kohhranah ngei Visit tûrin Pastor dîl leh ila rokhawlhna avânga min pe thei lo a nih chuan Methodist Kohhran leh Nazerenth Kohhran lama dil leh ni se tiin thu tlukna a siam ta a ni.

                    TIn, rorêl meeting thu chhuak ang chuan MMC/F Chairman leh Secretary te chuan Myanmar Wesleyan kohhrana Visit Pastor dîl tûrin 19th November 2019 khan Pastor dilna Email-in lehkha an thawn ta a ni. Chutichuan, Pastor dilna lehkha an lo hmuh hnuah chuan Wesleyan NEB te chu inhmu khawmin an ngaihtuah ho va, National Annual Conference huna rêl atân thu tlukna an siam fel hnuah Rev. D Lawmsanga (National Secretary) chuan 28th November 2019 khan MMC/F ah Email-in chanchin min rawn hriattîr ta a ni. 

Myanmar Wesleyan Kohhranah hian 2019 record kan hmuh aṭang chuan Rawngbâwltu Pastor 37 an nei a, ka hriat sual loh chuan Local 43 an awm a ni. Tin, MMC/F in Pastor a  dilna lehkha hi National Annual Conference-in a rel hmain National Adminstrative Board chuan an mahni nen inkungkaih ang a nih avangin 12th February, 2020 niah a ngaihtuah hmasa a ni. 
National Administrative Board (NAB) leh National Annual Conference (NAC) tih hi han sawi fiah hmasa ila; National Administration Board Ordained Minister zawng zawng 37 leh Local 43 aṭanga thlan chhuah up 37 belh an ni a, Board member zawng zawng hi 74 chiah an ni. Tin, NAB chu Board zawng zawngte zîngah chuan rorelna sang ber a ni.

National Annual Conference (NAC) hi rorelna sâng ber a ni a, kum tawp rorelna tiin kum tin February thlaah neih ṭhin a ni. Board zawng zawng rorel kaikhawmtu a ni. Tin, NAC ah chuan NAB bakah District 7 aṭang palai kal khawm 90 vel an ni a (District lianah chuan Palai kal an tam deuh) kal khawm zawng zawng hi 164 vel an ni.

MMC/F in Visit Pastor dilna lehkha chu NAB chuan 12th February, 2020 niah an ngaihtuah a, MMC/F a rawngbâwltu hlui Rev. Henry Lalhmuakliana pawh thu khawchang sawi tûrin sawm ani a,Pastor tirh leh tirh loh chungchâng chu a sawi lo nain kawng a awng vak loh thû leh he lama rawng a lo bâwl tawh dân ama mimal thil leh tûnlai vairus chungchâng a hlauhawm zia a sawi chu meeting kal khawm tam takin an hre thiam chiah lo niin a lang. Chutia a sawi zawh hnu chuan National Secretary hnên aṭang pawh tirh leh ngei a ṭhat thû leh Pastor dang dangte hnên aṭang ngaihdân an sawi hnuin Secret Ballot vote semin tirh leh tirh loh tûr chungchang an vote ta a ni. Mahse vanduai thlak takin an vote aṭang thutlukna chu MMC/F ah Pastor tirh rih loh tûr a ni tih a ni.

Wesleyan NAB thu tlukna chu Rev. Chanchinliana (National Superintendent) leh Rev. D Lawmsanga (National Secretary) te chuan Pastor an indaih loh avâng leh tûn anglai natna Covid-19 vângin Pastor tirh chhuah rih lo a ni tiin MMC/F ah chanchin min rawn hriattir a ni. National Secretary chuan Board pakhatin rem a ti lo chauh a nih thu leh Conference huna an ngaihtuah leh theih thû min rawn hrilh a chanchin lâwmawmah ngaiin kan lawm hle a ni.

MMC/F chairman Bawilianzama chuan Conference huna min ngaihtuah sak leh hram tûrin National Superintendent chu 16th February 2020 ni khan Pone-in a biaa mahse NAB-in a hmeh mit tawh thû a lo hrilh hnuin MMC/F Secretary Lalnunpuia chuan Rev. Ramthankuma (National Superintendent) hun laiin Rev. Lalremruata leh Rev. Lalhunglianate kan dilna NAB in rem an tih loh hnuin Kum 2017 Conference hmain "Pastor rem intih apiang min pe dâwn a nia" tia dilna lehkha ziak leh hnuin Conference chuan Rev. Henry Lalhmuakliana chu MMC/F a rawngbâwl tûra an rawn tirh thû chu 17th February 2020 niah National Superintendent phone-a ka biak hnuin lehkha rawn thun leh tûra a remtih hnuin a ni vekah Visit Pastor dil nawnna lehkha chu thawn leh a ni.

21st February, 2020 Myanmar Wesleyan National Annual Conference final niah chuan kan Pastor dilna lehkha chu chhiar chhuak lovin Superintendent chuan "MMC/F in Pastor an dilna chu NAB chuan a hmehmit hnuin Conference-ah an rawn dîl nawn leh a ngaihtuah nawn sak ṭha tih leh tih loh vawt kan la ang" tiin Secret ballot vote semtîr nghal a ni. Tin, chutia Vote an han chhiar hnu chuan 'ngaihtuh sak tawh lovang' tih vote a tlin avângin Wesleyan Kohhrana Pastor kan dil nawnna lehkha chu hnawl a ni ta a ni. Myanmar Wesleyan Kohhranin Pastor min pêk theih loh thû chu Nation Secretary hnên aṭang 22nd February, 2020 ni khan lehkha kan dawng.

A tawp berah chuan Myanmar Wesleyan Kohhran chuan MMC/F tân rawngbâwltu Pastor min pe thei ta lo chu Pathian remruatah kan ngai hmiah mai a ni. Chuvangin Tirhkoh Paula chuan Rom 8:28 ah "Tin, Pathian hmangaihtu, amaha ruat anga a kohvate tân chuan, an ṭhatna tûrin engkimin a thawhsak hlawm ṭhîn tih kan hria."  tia a sawi angin kan ṭhatna tûra Pathian remruat a ni e. Engkima lâwmthu sawi hi ringtute tih tûr a ni e. Chhiartu zawng zawngte chungah ka lâwmthu ka sawi.


===============================================================

Room Number 15A

Room Number 15A

(Noel Lalthangliana @ Thangsira Pa)

 ===============================

Chhak kawl phai-ah hmun kan chang lo,

Thlang tlang kai lah a rem lo maw;

Chun leh Zua run luah a rem si lo,

Sakhua leh hnam thliarnaah khan.

Chunnu a hawi mi en ngam lo,

Zuapan mi thlir mi phal lo maw;

Mangtha tiin mi thlah zuam lo,

Hriat loh lamtluang ka zawh dawn khan.

Satu leh Dua ka chhiar thiam lo,

Hringmi ni-an mi chhiar lo maw;

Lungmuan hun reng a awm thei lo,

Zawng leh khum eng hrannaah khan.

Sikpui lawm tiau chhum a zing ve lo,

Van nau lawm par a vul lo maw;

Zofa lunglawm a kim thei lo,

Ral tit run sang kainaah khan.

Khuangpui leh Dar ka tum thei lo,

Zo awi hla mawi hril a rem lo maw;

Chhuatpui lam tual chhir ka zuam lo,

Hunpui kutpui kan ur zan khan.

Pian leh murna ka nghilh ngai lo,

Kir leh turin a rem lo maw;

Hring chan khuavel ka hlimpui lo,

Hlut loh khualleng ka chan lai khan.

Chhung thar ka chhar ka bel ning lo,

Lunglen tuipui kan dai za maw;

Humtu niin mi thlei ngai lo,

Vaih khua chhiara ka tuan lai khan.

Mangan niin mi hnar ngai lo,

Khual tha iangin mi thleng fo maw;

Kha lo zawlbuk a awm chuang lo,

Raltiang ram mawi ka nghah lai khan.

RINNA LAWM MAN

RINNA LAWM MAN

       Evan. Hmingthanzaua

Heb.10:35-39. 

           Lal Isua chhandamna hi a khawngaih thil thlawn pek kan dawn a nia. kan tih ve lam a tel miah lo chu chu thilpek zawng zawnga sangber leh hluber a ni. Vanram kaina tiket ang a nia, kan thil tih leh nun hlui pawh a chhui lo chauh ni lo vin a nuaibo vek a ni, a lawmawm hle mai. Vanram kan kai hunah lawmman an lo sem dawna a thlawna chhandamna kan chan hian Van lawmman a keng tel lo. Chhandamna kan chan hnua Rinna inpuang taksa ngeia kan lo tih hlawh tlin kha Van lehkhabu ah pa in a lo chhin chhiaha kan thil tih ang zelin chu lawm man chu min sem dawn a ni. Chuvangin in Rinna (faith) lawm man chu paih bo suh u, lawm man ropui tak a nei dawn si a, min ti a ni. He leia thil thar kan neih mah kan lawm hle thina mahse rei lo te a tan a ni a, a chhe leh thei vek a ni. Van lawm man chu a te ber pawn chatuan a daih dawn avangin a hlu lutuka paih bo suh u min ti a ni.

Pathian duh zawng in tih hnuin chhelna imngai a sin min ti a, mi chhel lo te chuan thlemna leh buaina an tawhin an ke pen or thil tih an ban san thina lawm man ropui tak an chan ta tihna a ni a, a uihawm hle a ni. Chuvangin chhelna kan ma mawh hle a ni, reilote a chinah lo kal tura chu a lo kal dawn si a, rei a rial tawh lo vang min ti a. Mi thianghlim lawr hi kan hnaih tawh viau anga rukru angin lei rap lovin kan Lalpa chu a tlansate lawrin a lo kal thuai dawn a, rei a rial tawh lo vang. Nimahsela ka mi fel chu Rinnain a nung ang. Rinna hi Pathian chet tirna a ni a, Pathian thil thlawn pek ropui tak a ni. Pasalthain silai tha tawk a neih chu sahrang mi hrang a ngam thina ringtu in Rinna nung kan neih chuan khawvel hneha ngamna a ni, a hnung tawlh erawh chuan ka rilruin a mahah lawmna reng ka nei lovang a ti. Kei ni zawng boral tira hnung tawlh pawl a mi kan ni lo va, nunna humhim tura Rinna nei pawla mi kan ni zawk.

Inkhawm, tawngtai, Bible chhiar, thil pek leh thil tha tihte kan thlah thlam chuan kan hnung tawlh tihna a ni. Kan chhandamna bo lo mahse Rinna kawngah kan bo tihna a ni, rilru leh taksaa boral der hi an tam ngawt ang. Nunna humhim tura Rinna nei pawla mi kan ni zawk, inkhawm, thilpek, thil tha tih, Bible chhiar kan thlah thlam loh chuan Nunna humhim tura Rinna nei pawla mi kan ni dawn a nih chu.

Lalpan a thu malsawm rawh se.

================================================================

CHHUANLAM

                                              CHHUANLAM

                                         Evan. Zirliansanga

“Ngai teh,hei hi ka hriat chhuah tak chu a ni;Pathianin tluang taka nung turin mihringte a siam a,anni erawh chuan an tikhirhkhan zo vek a ni,"tih hi. THUHRILTU 7:29

Thil tha lo tin reng kan tih hi kan sual vang kan ti duh ngai lova mahni in thiam channa khawp chhuanlam hi chu kan dap hmu zung zung mai zawng a nih hi. Duh thu sam tam tak kan nei theuh, mahse a tak ram thleng tura tai mak chhuah peih lo te pawh in ka that chhiat vang emaw, ka in thlah dah vang emaw kan ti duh hauh lo, chhuanlam kan zawng leh mai zawk thin. Chhuanlam eng pawh hi tha fu awma lang mahse a lem vek ani a, mihring te min siam tha lo mai ni lovin min ti chhe nasa ber tu ani fo thin.

Ka tun hun a that theih nan kan chhuanlam siam te ni lovin, a taka kan rah ngei in min pek ka hlawh chhuah ani a, kan nakin hun pawh hi kan tun hun hman dan in a hril dawn ani. Tun dar kar chu ral mai mahse kan hun hman dan leh kan nun dan ve thung chu a ral mai lova, thu a la sawi dawn chauh zawk ani.Eng chen nge hun kan neih tih aiin eng tin nge hun ka hman tih hi a pawimawh zawk ngei ang.kan history kan ziak mek ani a, pen tui hmang lovin kan nung chang in kan ziak ani zawk.

Chhuanlam kan siam mai ai maha tha lo zawk chu tum mumal pawh neilo, hmathlir leh rilru hnget pawh neilo hi ani. Mi puitling nih te chu thil harsa ani mah na, mahse kan hun tha neih ve chhun nilo lutuka kan hmang liam mai thin hi chuan kan changkanna kawng min dala, kan hma hun a ti thim tlat ani.Tlai khawhnua inchhir hian sawtna a neih loh a vang in thil kan tih dawn in ngun taka ngaihtuahte, chumi atan in buatsaih lawkte, a tul tur thil dap lawkte, Pathian hnena hlante, tawngtaina hautak hmante, mahni in zawh nawn fo te, a nuam leh harsa tawk tura in ruahman lawkte hi a pawimawh em em ani.

Harsatna tawh changa mahni in khawngaih mai thin mi tan hlawhtlin a har em em maia, a nuam deuh thlen changa in thlah dah leh mai thin te pawh an zuihral duh chawk.Buai lem lova hlawh tling a awm mai ngai lova, harsatna chhe te mah tawk lo mihring a awm theih loh. Harsatna tawh chang pawha tuar fan fan tute, buaina tamtak karah theih tawp chhuah bei fan fan tute, an hlawhtlin in an chapo mai ngai lova harsatna leh buaina hnuai ah zirtirna tha tak an lo dawn tawh vang ani. Thil engkim hi hmangthiamtu tan chuan zirna thatak ani fo thina,thenkhat ve thung chuan chhuanlam eng eng emaw siam in an in tih chhiat phah thin.

Kan nun hi hlimna in a khat mai lova lungchhiatna in a luah reng chuang hek lo. Keimah avang in ka nun pumpui hi hmuhsitna in a tuam theia, chawimawina nopui pawh a dawm thei bawk. Tun darkara kan nun zia hian kan hma hun tur a tarlanga, chatuan hmun thleng a hawlh tlang ani. Pathian khawngaihna in malsawmna tinreng min vura, keinin kan lo hmangtlahawlh leh thina, malsawmtu thinlung tina tu mai kan lo ni thin. Eden sulhnu chhuinawn ngai lo turin Kalvary thihna rapthlak a rawn tuara, keinin makah kan ngai loh san mai thina, Malsawmtu Pathian ah kan tan kawng kan ti tawp mai thin ani. Malsawmtu Pathian kan zah lohva, ka mihring puite kan makngaih loh bawk chuan a kaw zim lam leh thlaler ramro kan pan mek tihna ani. In ngaihtuah harha in siam tha duh tan Pathian leh kan mihring pui ten mal min sawm tur in min lo welcome reng tih hi hriat a tha hle ani.

I in peih chuan tunhi hun lawm awm ania, nun thara bul tan turin I rilru sawh hnget ang che.Hreawm tuar turin taimak chhuah la, harsatna tawk turin in ti huai ang che. Tum mumal tak nei in ding chhuak la. I kawng tur ngaihtuah in thlir lawk ang che. Hman hmawh lovin ni khat te te in hmasawn tumla, I hmuh leh I hriat te chik ngun ang che. Chhuanlam siam tawh suh la chindan tha vawng zawk ang che. I Pathian leh I mihring puite mit tlung ni tur in ke pen tum hram ang che.

Tah zet chuan I dil loh malsawmna tinreng pawh in a zui duah duah ang che a, I nun a hlim ang a, dam man nei I lo ni tawh ang. He lei ah van nun tem lawk in tu leh fa malsawm fanau tinreng te nen rei tak dam in mi nuamsa I ni thei ngei tawh ang.

================================================================

Ram Thumna leh Kei

                                     Ram Thumna leh Kei

Lalbiakzoi

Malaysia Mizo Community a dinna kum 10 a lo in her ve ta reng mai!! A dintu zingah tel lo mah ila kum 4 lai ka lo luhchhuahna anih vangin ka in ti ‘neitu’ em em a, community member te chhiat/that engkimah ka lo luangliam ve fo thin. Kum 10 hmel a hmuh theih chhan hi hruaitu hmasa leh ni mek te taihmakna, inpekna leh thahnem ngaihna a ni lo thei lo. Hruitute hi member ten sawi sel ai chuan tha leh zuala min hruai theih nan tih phur dan i zawng thiam zel ang u. Malaysia hi khua leh tui kan nihna hmun tur ni lo mahse, 

Malaysia-a kan khawsakna hian hringnun rahbi kan penchhoh zelnaah nasa takin nghawng a nei a ni.

Thuziak tura kei ve teh lul min hrechhuak hi ka lawm hle. Chhiar tute tana tangkai theihna pakhat tal ka pholang thei a nih phei chuan a lawmawm zual ang. Canada ram a lut Duhlian tawng hmang kan tam lo bawk a, ka thil hmuh leh hriat te thiam ang tawkin ka han thailang ve ang e. 

Canada ram hmel hmang

Canada hi khawvela ram lian ber pahnihna a ni a, Map kan bih chuan USA chungah a awm tih kan hmu thei ang. USA nena in ramri na langsar tak pakhat chu ‘Niagara Fall’ an tih lengkir lianpui kha ani a, khawvela hmun lar tak pakhat a ni nghe nghe. USA a State an tih hi Canada ah chuan Province tiin kan ko. Province 10 leh Territory (state ni pha chiahlo) 3 in a hlawmkhawm a, Ontario province-a Ottawa khua chu Canada khawpui ber (capital city) a ni. Amaherawhchu, mi tam tak chuan Toronto khua hi Canada-a mihring chen tamna ber a nih vangin Canada khawpui tlukah an ngai. Kuala Lumpur leh Delhi atanga thlengthla Chin refugee te hi Canada khaw hrang hrang Kitchener, Toronto, Ottawa, Vancouver, Edmonton leh Calgary ah te kan khawsa ve a. Duhlian tawng hmang refugee thleng hmasa ten Calgary khuaah bu an lo khuar avangin vawiin thleng Canada ah chuan Calgary hi Duhlian tawng hmangte khawpui a tih theih awm e. Mizo Community of Canada (MCC) a ding a, Pathian biak ho nan Calgary Chin Evangelical Fellowship (CCEF) a awm bawk. Pathian zarah serh leh sang khawih thei pastor 3 laiin min awp lum a, puitling leh nausen hming ziak hi thu ziah mek lai hian 67 chiah kan ni.

USA ang thovin ram dang dang atanga thleng lut kan ni hlawm a, Burma ram thenawm India, Vietnam, Cambodia, China, Thailand leh Philippines atanga thleng thla pawh an thahnem khawp mai. Burmese hmel hi Philippino nen a in hnai em a, ‘Philippino i ni em?’ tih zawhna kan dawng fo. ‘Burma/Myanmar’ ram hi khawi ah nge a awm? tih hria erawh an tam lo hle. Lutuam thenkhat ho chuan ‘Rohingar’ boruak avang khan an hre nghal thei mai.   

Canada thatna

UN kal tlanga Canada ram kan thlen luhin  PR (Permanent Residence) kan ni nghal a, a hamthatna pakhat chu damdawiin (hospital leh clinic) pan man a thlawn vek a ni. In zai pui (operation) leh nau neih pawhin mahni sum sen a tul lo. Ha leh Mit pawh check-up pangngai anih chuan sen a tul lova, enkawlna (treatment) thenkhat lak a nih erawh chuan mahnia sen tur a ni. Insurance nei tan Insurance in a pek sak chin a awm. Damdawi hnawih tur emaw ei tur emaw lei dawnin mahni a sen a tul. Mahse Tax file hunah a thil tel theih a, sawrkarin sumlakluh (income) azirin rulh let a nei thin. Sawrkar sikul (Public school) ah fee chawi ngai lovin naupangin lehkha an zir thei a, naupang te kum 18 hnuai lam an nih chhung chu thla tin sawrkarin puihna a pe. Nu leh pa te sum lakluh milin an pek zat erawh a in ang lo. Canada-a kum 3 khawsak hnu ah a ram mi nihna a dil theih.

Canada that lohna

Thlasik a rei a, a ram leilungah thlai chin hleih theih anih loh avangin ram dang atanga lut kan ring ber. Chuvang chuan khawsak man (living cost) a sang. Engkim a to ti mai ang.

Canada thlen dan kawng hnih

Kawng khatna chu UN kaltlang a ni. Kawng hnihna chu Sponsorship (in koh). Sponsorship ah hian mimal leh community/organization hmingin a koh theih. Mimal atangin kawppui te, nu leh pa te koh theih a ni a, community/organization chu kohhran hming emaw, group hming emaw a koh sawina a ni. Meeting/training/visit anga rawn lut, haw leh tawh lo ‘Refugee’ dilna thehlut a cham hlen pawh an awm ve bawk.

Canada Sap

Sap kan tih chu vun var, sam buang, mit paw leh pumraw lian deuh kha kan kawh tir ber in ka hria. Canada a ka hmuh phak chin Sap kan tih mai te hi German, leh Ukrainian thlah an tam khawp mai. An pi leh pu te kum 100 kal ta vel khan sakhaw zalenna sualin Canada-ah ral tlanin an lut a, vawiin thleng an in bengbel. An pi leh pute tawng leh culture chhawmnung an tam lutuk lo.

Vakrawlai

Kan ramah ram thim nawra rawn kalte kha Sap kan hmelhriat hmasak ber an ni ti ila a sual awm lo ve. Pathian rawngbawl hmasa an ni bawk a, vawiin thleng ngaihsan an la hlawh fan. Chutih karah a hmuna han chenchilh takah chuan vakrawlai (homeless) hmuh tur an awm nuk mai. Sawrkarin an riah luhna tur (Shelter) a siamah an awm reng peih bik lova, kawng laia kutdawh te in emaw, a rem dan ang anga mutbu tuah ve mai, rui deuh hu, rimchhe ve tak te pawh an awm. Mimal zalenna haksual tuhrah ni berin ka hria. Nu leh pa ten an fa te kum 18 an tlinin in dan an phal. Kum 18 nazawng hi an puitling kher silo, mahni ke a dinchhuah hleih theih tak lohvah chuan nun beidawnna in a zui mai a, zu leh damdawi a an tluk tawh tawh si chuan mi pangngai ang in an nun an vawng zo tawh lova, vakrawlai (homeless) nunah an tlu zui ta a ni.

Sap tawng leh Sap ram

Sap tawng (English) official-a hmanna Canada, USA, Australia, United Kingdom (leh a dangte) hi sap ram chu ni ngei mai. Sap ram ah chuan system a tha a, kan suangtuah phak loh daihin kan khawsak ve theih phah.

Sap ram leh Kei ni

Sap ram kan tih chu taksa ngei thleng thla in ka cheng teh meuh mai. Mahse puitlin hnua thleng thla te khawsak dan ka hmuh hian Sap ram a hran, keini a hran riau a hriatna ka nei thin. A chhan chu Sap tawng ti ri ve sawih sawih thei mah ila, an SAP-NA tak tak kan pawh lova, kan tui lo bawk. Sap rama cheng nafam Sap tih dan (entir nan BBQ leh Baby Shower) kan seng te awm mahse ‘khawlama kan tih dan leh ngaihdan’ kan la thlah chuang lo. Chiang deuh pakhat chu hun hman dik chungchang. Thlenkim hun tura tiam ‘darkar’ kan la ngaihthah fo. 

Chenna in

Malaysia ah khan room zin te ah kan in hnawh deuh teuh thin vang nge, thlenhlim chuan Canada-a in te hi zau nuam ka ti theih khawp mai. Mahse ka cheng rei tulh tulh a, ka hmu zim tulh tulh. Engkim hi a ‘ba’ a lei theih vek a ni nen inchhung bungrua mamawh chin baka leih belh zel a awl em a ni.

Chhiah pek reng a ni

Burma leh Malaysia ka khawsak lai khan thil lei reng rengin chhiah (Tax) ka pe ngai lova, Canada ah chuan engpawh lei ila, thil man bakah chhiah (tax) min la tel zel kha ka thlen tirh chuan ka ui thei khawp mai. Tunah chuan ngaiah ka nei tan ve tawh.

Tha leh thalo inkawp tlat

Ram thumna hian huhang a nei na hle. A chhan leh vang engpawh chu lo nise UN in an record ah hming min ziahluh tawh chuan ram thumna thlen hun tur rilru ah a riak tan. He beiseina hian tawrhchhelna a hringchhuak a, thil tha tak a ni tlat.

Ram thumna thlen hi ‘Vanram note’ thleng tluka tehkhin pawh a dik lo teh chiam lo. Ram thumna thleng ta te Facebook en mai pawhin hahipa sawi tur a awm thin. Mahse thil engkim hi ‘tha leh tha lo’ a kal kawp vek tih kan hriat reng a pawimawh. Chenna room insawn pawh thil awllo anih angin chenna ‘Ram’ insawn phei chu thil hautak tak a ni. Ram thumna thlen kan chak chhan e nge? tih hi mahni ah kan chiang em? E nge kan seng luh ang a, e nge kan thlahliam dawn? Tawng leh culture hi thenhran theih a ni lova, kan faten Sap tawng an hman thiam viau tawh chuan kan culture ai Sap culture chu nuam an ti chho dawn. Ram thumna thlen vanga kan ro hlu kan fate kan hlauh a nih si chuan a lungchhiat thlak ngawt ang.

Nun tam  

Sap rama tha ka tih deuh leh an mahni Sap ho ngei pawhin a an ngaih pawimawh pakhat chu ‘Giving back to the community’ tih hi a ni. Pum bilh lo thukhawchang (Theory) hi ram pawhin a thatpui. Ram thumna kan thlen hlim chuan tu te pawh bul tan vek kan ni a, sawrkar leh hmun hrang hranga tanpuina te kan mamawh thin. Rilru pangngai tak pu tan chuan mahni kea din ve theih hun kha bitum lian ber tur a ni. Mahni kea kan din theih tawh chuan keimahni atang kan chhungte, kan thiante, kan pian leh murna khawtlang, kan ram chenin chhawmdawltu kan ni thei dawn a, chu chuan ‘mahni in zahna (self-respect)’a neih tir a, Ram ropui nena inmil ‘Nun tam’ kan nei thei dawn a lo ni.

Lungawina kim

UN boruak chu ‘Pa’ chauh lo chuan a  hre lo ti ten fiamthu kan thawh a, ram thumna kal tura step zawng zawng kan rah kim biai tawh pawhin e nge maw vang tala thulh a awm leh theih zia a ti chiang. A pawimawh ber chu khawiah pawh awm ila, lungawi taka kan awm theih a tul. Lungawina chu eng tia zawn hmuh chi nge ni dawn? Ram thumna kal hi ‘lungawina kim’ a ni tih lam ka kawh tir lo. A teuh lo lutuk zawk. ‘Lungawina kim’ chu Pathian atang chauh loh chuan a awm thei lo. Ram thumna thleng tawh zingah thalai in awk hlum chanchin hriat tur a awm te hi eng vang nge? Hringnun an hman mekah an lungawi tawk lo tihna a ni mai.

Ram khatna awm laiin Ram hnihna, Ram hnihna atang Ram thumna ah, Ramthumna kan thlena kum tam a vei hnu ah Ram khatnaa zin/kir chakna a rawn piang leh. Engkim tih kuala neih loh hnawhkhahin ‘Lungawina kim’ min pe chuang lo.

Neihsaa lawm hliah hliah hi Pathian thu in min zirtir ni mahse mihring danah hmasawn lo tehfung a ni lawi si. Midang nena in er emaw, mahni leh mahni duhthawhlohna reng renga buai he khawvel a hringnun kalsiam hi a chang chuan hahthlak in tih ve thin ka ring.

Insawizawina

Harsat kan tih hi hun in a liam pui a, hlimawm kan tih pawh chuti tho. Khawiah pawh awm ila, Ram lina ‘Chatuan ram’ atang kohna dawng hman reng a kan awm a thupui ber. He khawvel hi taksa, rilru leh thlarau insawizawina hmun leh hun ah hmang ila kan hlawk zel ang.

Kei (kan nihna)

Mihring hlutna hi thiamna, finna, hausakna, hmingthanna leh thil dang dangte a teh thin ni mahse Pathian ringtu kei ni tan chuan ‘Isua thisena tlan, Pathian faa vuahte’ kan nihna hi a hlutna zawk chu a ni. Khawi ramah pawh awm ila, eng ang dinhmunah pawh ding ila, Pathian neitute chu engkim nei tu kan nihna hi i hre nawn fo ang u. Pathian neitute nun hi Ram thumna thlengta te pawhin an awh ber a ni zawk. Kan rin Pathian hi a NUN tlat avangin mihringin a kan mamawh beiseina min siam a, kan zawn fo lungawina leh hahchawlhna min neih tir bawk thin. Sam 119:2 Thinlung zawng zawnga amah zawngtu, A thuhriattirna zawmtute chu an va nihlawh em!

=============================================================