Professional leh Ringtu Nun

PROFESSIONAL LEH RINGTU NUN

Kap Lian Ngura

Thuhma

Tun tum Malaysia Mizo Community Tin Jubilee atan mahni vei zawng thu ziak thei tura damna min petu kan Pathian a hming fakin awm rawh se. Thu ziak thawh ve tura duhsakna min hlantu MMC hruaitute leh member zawng zawngte chungah lawmthu ka sawi tak meuh a ni.

Kan hriat theuh angin professionl tih hi “thiam bik” tih nan kan hmang tlangpui thin a, tun tumah pawh hian thiam bik tihna atan kan hmang ang. Keini tlangmiteah hian professional tia koh tur kan tlem hle awm e. Chuvangchuan ka vei ve dan ang anga professional tih ziak hi ka chak ve em em thin a, thahnemngaitak leh ka vei ve dan ang anga ziakin he thu hi hnutchhiah ve ka duh a ni. Thiam vang ni lovin thurawn “quotation” awm lovin ka vei dan ang angin ka rawn ziak ve rawih a ni e.

Tlangmi-teah Professional kan tlem bik chhan

Keini tlangmite Lalpa zarah Chanchin Thaa chhun en kan lo nih vena hi kum 100 tha chauh a la ni a. Tin, kan tawn phak chinte pawhin a la pha lo pawh a ni mai thei, mi “thiam bik” kan tlem hle a ni. Lehkha thiam leh zir sangte lam tun tumah hian  sawi kan tum lo a, Professional “Thiam Bik” kan tih hian zirna sang bikte  leh  hna tha bikte chauh a kawk lo tih hi hre hmasa phawt ila. Kan thiam zawng emaw, kan chemkal zawng apiangte hi an tha vek  a ni. Mi tam zawk te’n mite hlawhtlinna kan hmuhin, chu an hlawhtlina ang chiahah chuan hlawhtlinna neih ve mai kan tum thin a. Kan tih ve zawng, kan chemkal ve zawng a nih leh nih loh pawh ngaihtuah chuang lovin kan tawngpawng bawh huam thin hi a fuh loh chang a awm thin.

Entirna; mi, tu emaw chuan khual zin sumdawnnaah sum pei pungin hlawhtlina a lo nei a, chu a hlawhtlinna chu itin khual zina sum dawn kan duh ve mai ta thin a ni. Sum pei pung turin eng kawnghmang mah hre lovin kan phur ve hlut mai ta thin a. Chutiang chuan mite hlawhtlinna kan hmuhin tih ve zel duhna min neih tir thina kan tih lawr duah fo thinna hian hlawhtlina tak min neih tir thei lo fo a ni.

Tum Bik (Focus or Specialization)

Kawl phaia cheng zofate context atang kan thlir chuan education background avangin mi tam zawkte’n tum mumal tak neia thil tih a harsa hle a ni. Chutihrualchuan, kan chenna khawvel changkang chho zelah tun atang chuan tlang mite thangharhin Lalpa’n mi tinte hnenah kan inchawm nun theihna tur thiamna, theihna min pe vek a ni tihah hian thangharh ve tawh ila. Lalpa’n talent min pekah hian lian bik, tha bik, sang bik a awm chuang lo va. A pawimawh ber mai zawk chu; kan thiam ve zawng, kan chem kal vena taka “Bur Tlat” thiam hi professional nih dan kawng tha chu a lo ni. “Duh-Duh-Dun-Dun” din hmun atang chuan “professional “ din hmunah min hruai thleng thei lo a ni. Thil pakhata bur thiam, innghat tlat thiamte’n an thil tihnaah hlawhtlina, “professional” nihna an chang thin a ni.

Kan Ringtu Nun

Kristian kan lo nih tana leh mi piangthar kan nih tawhna ngaihtuah chuan thlarau nun hausa  kan tam lutuk lo hle a ni. Duh kan ngah lutuk hian ringtu nun pawh hi min ti chak thei lo a ni lo maw! saw pawh duh, hei pawh duh tho …. duh vek chungin Lalpa rawng kan bawl tlang a ni deuh em aw !?

Johana 21:18” Tih tak meuhin, tih tak meuhin ka hrilh a che, I naupan lai khan I taiah I inhreng a, I duhna apiangah I kal thin a; nimahsela I upat hunah I kutte I phar ang a, mi dangin an hren sak ang chea, I duh lohna lamah an kai ang che,” a ti a. Ral dona hmunah mi’n a kut a phar chuan ka “tlawm e” tihna a ni. Lalpa rawngbawl tur chuan khawvel thilah kan tlawm phawt a ngai a ni. Ringtu zawng zawngte hi ral do mekte kan ni a. Khawvel ral do tur chuan chak tawk a ngai a, chak tur chuan thil tam tak tih ngei ngei ngai a awm ngei ang le. Ringtu  Lalpa rawngbawl tur chuan “Kut Pharin” (surrender) duhna zawng zawngte kalsanin(surrender) a duhtu duh lamah, Thuthlung bawm phurtu bawngpuiin Beth-semes lam panin kawng chu a zawh ngat ngat (I Samuela 6:12) ang khan, kan duh lohna lamah, a kaitu duhna lama kal miah miah tur kan lo ni zawk a.

Ringtu leh rawngbawltu tam takte’n Lalpa rawngbawl hi a tha tih hriatna zawn atanga rawngbawl kan tam emna hian thlarau nun intihchaktawnna nun tak tak kan pawh lova, Lalpa’n ropuina pawh a chang tak tak thei thin lo a ni. Ringtute zingah inchhemalhtawnna ai mah hian inchaltauhna a tam hian kan chhungril thlarau nun a tichak thei lo fo mai. Dah that chin nei thiamin, duham lutuk lovin, khawvel thil (secular) leh thlarau nunah pawh “professional” kan lo nih chhoh zelna kawng i zawh tan ang u hmiang.

Chutichuan Khawvel thil, kan chem kal vena zawnah mite tana rawn tlak, rinchhan tlak kan lo ni tawh ang a, thlarau nunah pawh nun hausa kan ni tawh dawn a ni.

=====================================================================